Thantlang Khuachung Ah Zuu Zuar Lo Ding In MP Pi Ni Sui Lian Nih Biahalnak A Tuah

Salai Elvis| 2019 May 23| May 22 Pyithu Hluttaw caan hman tonpumhnak ah MP Pi Ni Sui Lian nih Thantlang khuachung phungning in Zuu License ngeimi pawl phihlhar piak dingin biahalnak a tuah tiah kan theih.

Thantlang khuachung phungning in Zuu License ngeimi hna cu kham dingin timhtuahnak ngeih a si maw? asiloah dingrep (siikaan) ning tein an zuar nakhnga tawlrelpiak nak kong timhtuahnak nan ngei maw timi biahalnak a tuahmi cu ramkomh minister chang a si mi U Tin Myat nih a tanglei bantuk in bialehnak a tuah.

“Thantlang khuachung ah phungning in Zuu zuar mi minung pathum cu phihkharpiak lo in zulhphung ning te le felfai tein an zuar nakding ah kan tawlrel ko hna lai” tiah U Tin Myat nih bia leh na a tuah.

MP Ni Sui Lian nih, “Mino hna cu theihkauhnak lei ah an chambau, din-einak kong ah dingrep (siikaan) an ngeih lo caah innchungkhar ah a herh lo mi tiang siknak a chuak i thilrit chuahpitu an si caah a tubantuk in biahalnak a tuah hi a si.

“Phunging in Zuu License ngei mi kan phihkhar piak hna ah cun, khuadang le pawngkam in phungning lo Zuu chiakha a lut chin lai phan a si caah a tu License ngei cia minung 3 pin ah mi dang Zuu License pek ti hna lo ding kong le a tu lio a zuar mi hna cu phungning in le felfai tein zohfelnak tuah an si lai nak kong, Thantlang khuachung rithaisii kongkau tawlreltu phu meeting biachahnak an ngeih nak kong. Pathian ni, Ni sunglawi ni tibantuk zongah Zuu zuar lo ding in an kham mi hna zong pehzulh a si rihnak kong” U Tin Myat nih bia leh na a tuah.