Thantlang Khuachung Aung San Milem Chiah Mizapi Nih Duh Lo Bu In Nawr Chih Phung A Si Lo: Sipin Minister Soe Htet
Salai Elvis| September 11| Thantlang khuachung Bogyoke Aung San Milem chiahnak kongah mizapi hna nih an duh lo ti theih ko bu in nawr chih phung a si lo tiah sipin vuanci U Soe Htet @ Salai Me Luh nih a chim.
Aung San milem le pangpar dum tuahnak ding caah ramkulh sipin budget sing 300 dih dingin tuah timh a si nain riantuan tu Company an um lo caah Thantlang sipin nih ramkulh cozah sin ah riantuan ning cang ruahnak an hal hnu ah Thantlang sipin Committee le khuanu/pa nih tawlrel dingin timh tuahnak ngeih a si cang.
“Hi kongah ramkulh cozah ruahnak a kan hal hnu ah Cabinet meeting biachahnak zong ngeih a si cang. Hi rian an rak sok lio ah Bogyoke Aung San milem le pangpar dum tuahnak caah tiin ramkulh sipin budget sing 300 an rak hal. Sinain ramkhel lei he aa pehtlai mi milem cu an duh lo caah an duh nalo in van nawr chih phung zong a si lo tikah sipin pangpar dum tiin sipin committee hna le khuanu/pa nih an tawlrel te lai. Zei tik rian an thok lai timi zong EO nih meeting a auh hnu hna ah aa fiang te lai.” tiah sipin vuanci U Soe Htet @ Salai Me Luh nih TCP ah a chim.
Hi kong ah Thantlang sipin Committee le khuanu/pa hna nih phungning in a tawlrel ning cang zei hmanh an theih rih lo.
“Atu ni tiang ramkulh cozah lei nih, cu tin rak tuah u timi ca zong a phanh rih lo pin ah ho nih dah rian an tuan lai timi kong zong an kan chim rih lo i zei hmanh kan theih mi a um rih lo” tiah Thantlang sipin lutlai Thluai Iang nih TCP ah a chim.
Thantlang khauchung Bogyoke Aung San milem le pangpar dum tuah timhnak kongah Thantlang khuachung zatlang bu kip fonh hna nih fakpi in an doh i sipin vuanci sin tiang duh lo nak ca an rak pek bal. Milem tuah nak ding tangka ai-ah khuachung than chonak caah hman deuh ding le mizapi duhnak lak ta hma sa ding pawl a bik in ca an rak kuat mi cu a si. +++
About The Author
