Thantlang Khuachung Aungsan Milem Tuahding Riantuantu An Um Lo Caah Ramkulh Cozah Nih Tawlrel Piak Ding An Hal Hna

0

Salai Elvis| 2018 July 16| Thantlang khuachung ah ramkulh sipin budget in pekmi sing 300 dih in Aung San milem le pangpardum tuahding mi cu riantuantu Company an um lo caah Chin ramkulh cozah nih tawlrel piak dingin an hal hna tiah theih a si.

Hi milem le pangpar dum tuahnak ding caah 2018 April 7 in 20 tiang Tender auh a si nain tlai hnu pi ah may-mat-ta-kalay Company nih an hmuh. Asinain hi Comapany nih tuah lo dingin aa let than hna caah Thantlang sipin nih ramkulh cozah tu nih tawlrel piak ding in an hal than hna hi a si.

“Maymat-ta-kalay Company nih hin Aungsan milem tuahnak ding ca lawngah aa ruah, sinain pangpardum, lam cawhnak te hna he kemh chih in tuah ding a si tik ah kaa kaih than lai lo a ti caah a mak i hi rian ramkulh nih tlangtlak pi dingin kan chimh hna lio a si. Anmah nih tha tein an ceih hnu ah zeitindah bia an chah lai i cutin rak tuah u an kan ti ning paoh in kan tuah te ko lai” tiah sipin Committee caan karlak Chairman Pu Ngun Hram nih a chim.

Hi kongah Aung San milem le pangpardum tuahnak ti si lo in Aung San pangpar dum tuahnak tiin a min zong an let i an remh than.

“Ramkulh cozah nih tawlrel piak dingin kan chimh hna anmah nih a tha rem an ti ning poah in tuah a si te ko lai, a min zong Aungsan milem tuahnak si lo in Aung San pangpardum tuahnak caah tiin kan let cang. Hi chungah Aungsan milem zong an chiah chih lai maw/ lai lo ka thei lo. Ramkulh cozah nih a tha an tining in an tuah te ko lai” tiah sipin Committee caan karlak Chiarman Pu Ngun Hram nih TCP ah a chim.

Mah Aung San milem le pangpardum tuahnak ding caah ramkulh sipin nih sing 300 a pek hna. Hi rian cu 2018 April thla in September thla chungah tuan chuah ding a si tiah kan theih.

Aung San milem tuahnak ding kongah Thantlang khua chung zatlangbu hna nih duhlonak ca ramkulh sipin vuanci sin ah ca rak chiah le hi milem ai-awh ah khau thanchonak dangdang tuah piak ding le mizapi duh nak hnatlak nak lak hmasa ding in ca an rak chiah bal nain hi kong ah Chin ramkulh cozah nih hmalaknak zeihmanh a tuah rih lo tiah theih a si.+++

About The Author

Na ruahning rak langhter ve.. (Leave a comment)

%d bloggers like this: