Thantlang Khuachung Centenary Thlacam Inn TCF Nih An Remh Lai
Salai Elvis| 2018 July 31| Thantlang khuachung Hakha lei in Thantlang luhnak hmun ah a ummi Centenary Thlacam inn cu aa rawk mi tete a um caah Thantlang Christian Fellowship (TCF) nih an remh lai tiah theih a si.
Thantlang khua Khrihfa kum 100 tlin philhlonak caah tiin TCF nih 2010 kum lio ah rak sakmi Centenary Thlacam inn cu a ropcak pah caah Khrihfa bu kip sinah bawmhhal in sing 17 dih in remh an i tim tiah theih a si.
“Mah thlacam inn saknak caah TCF nih Khrihfabu kip sinah thawhvo phawt cio an si. Asinain phungning in ca cu kan pe rih hna lo. A ruang cu tutan ah Kachin ralzam caah cabawm he aa pehtlaih tuk caah a si. Hi inn remhnak caah sing 9 hrawng nih a nguh lai tiin kan tuak nain a chunglei hna remh ding avun tam ngai caah sing 17 hrawng cu a remhnak ah kan dih te lai tiah kan suai chung. Kan remh ding cu a inn sii thuh, inn hmai lungphun, inn chung Seeling tuah le a dangdang a rop cak deuh mi thlen remh kan timh” tiah TCF Chiarman Pastor Dr. Duh Sang nih TCP ah a chim.
Mah thlacam inn kan hman ning hi a tlawm ngaite, a ruang cu Bu kip cio ah Biakinn chungah thlacamnak hmun kan ngeih cio hna caah a si ve. Mi zei paoh nih zalong tein dinhnak le thla camnak hmun ah hmang hna seh ti kan duh. Atu lio ah Centenary Thlacam inn cu PCH ngaktah nih thlacamnak hmun ah an hman deuh bik. Khi hmun ah khin vailam tah tung ngan pi phunding zong saduh thahnak ngeih a si” tiah a biapeh ah a chimchih.
Centenary Thlacam inn cu Thantlang khuachung Bu kip fonh 12, TBC, RCM, CJC, AG, PCM, UPC, SDA, EFCM, COTR, EHCM, JMBC le EPCM Khirhfabu nih 2010 kum lio ah rak sakmi inn a si.
About The Author
