Thantlang Khuachung Concrete Phahmi Lam A Rawh Colh Caah Riantuantu Company Nih An Remh Than Dih Lai
Salai Elvis|2019 June 17| Sipin nih tlaihmi Thantlang khuachung a bik in, inn karlak lam Concrete phah mi cu a pawkmi le aa rawk mi a um sual ah cun riantuantu Company lei nih kum hnih chungah an remh than lai tiah sipin Committee chungtel pakhat nih TCP ah a chim.
Khuachung lam Concrete phah mi chungah cheukhat lam phah mi cu an dih thla khat hmanh tlin hlan ah a pok colh mi tete zong an um len tiah kan theih.
“Aung-tha-pyi lam (Town Hall kainak) lei khi pe 12 kau zung 9 chah in phah ding a si ko nain pe 12 lawng cu a bit deuh pin ah le motor pahnih i kianhnak ah a ke tla ding a si, cun Kat-ta-za zong a rak i phah cia nak a si caah motor zalong tein kal khawhnak ding caah pe 12 kau timi tu kha 18 hrawngah kauh piak i kat-ta-za cung deuh cu pen deuh zung 6 in le a kam lei tu cu zung 9 in na kan phahpiak lai tiah kan chimh hna i kan chim ning tein an phah ve. An phah ning aa rawksual i a pawh sual a si cun riantuan tu Company nih kum hnih chungah an remh than lai” tiah Thantlang sipin Committee Pu Biak Tha Cung nih TCP ah a chim.
2018-2019 budget kum ah Thantlang khuachung sipin nih tlaih mi Sing 10 in sing 100 kar tender auh mi chungah Concrete lam phah ding hmun 3 a si. Cu chungah Aung-tha-pyi lam (Town Hall kainak lei) meter 213 riantuantu Zo Chin Tit-sar Company nih Ks. 33.600 dih in riantuan mi, Lungtial bo Concrete phah mi(pe 1300×12) ks. 57.000 dih in Chin Pyithar Company le MCH hmai (meter 137, ks. 22.800) dih in Friend Heart Company nih an tuan.
About The Author
