Thantlang Khuachung Inn License Thar 22 Pekchanhnak An Tuah
Salai Elvis| 2019 May 16| Thantlang khuachung a um i inn license a ngei rih lomi 22 cu ramkulh penguk zung le pengkomh zung nih May 16 Town Hall ah phungning tein pekchanhnak an tuah tiah kan theih.
Mizapi sin ah pekchanhnak an tuah hi avoi khatnak bik a si. Hi kong he pehtlai in MP Dr. Hmuh Thang nih, “penguk zung cu acozah uknak tangah an chiah hi a kum hmanh a tling rih lo mi chungah hi bantuk in mizapi nih an i hngahhlang tukmi inn License thar pekchanhnak nan kan tuahpiak mi cungah kan i lawmtuk. Hihi thlennak pakhat zong a si. Atangmi hna zong a rauhhlan ah nan kan tawlrelpiak lai ti zumhnak kan ngei” tiah mah ni pekchanhnak hmun ah a chim.
Thantlang penguk zung nih inn License chuahpiak dingin Hakha pengkomh zung ah 128 an kuatmi chungin 2019 May 16 ni pekchanhnak ah 22 le a luancia kum ah pumpak in zungah a hlam cangmi 20 an si i License chuahpiak rih lomi 86 tluk Hakha pengkomh zung ah an tang rih. Pengkomh zung nih License chuahpiak than dingin Thantlang penguk zung nih a tawlrel lio mi zong a um rih tiah kan theih.
Hi inn Lisence pekmi hna cu Thantlang khuachung sangkip cawh an si hna i hi chungah a tam deuh cu sianginn sang ummi deuh an si. Mah License chuahpiak mi hna cu kumhra chung tiang lawng a si lai i kumhra a tlin in License (tat-tann-toe) than a si lai tiah Thantlang penguk zung tuanvo ngeitu pakhat sin in kan theih.
Atu lio Thantlang khuachungah sangthen 3, inn chungkhar 2,068, inn 2,000 tluk le minung 9,046 tluk an um tiah theih a si.
About The Author
