Thantlang Khuachung Kutzungthiam Hna License Ngei Lomi Nih Inn Sakkhawh A Si Ti Lai Lo
Thantlang khuapi
Salai Elvis| 2018 April 28| Thantlang khuachung kutzungthiam (let-ta-ma) hna cu License ngei lo in inn saknak nawl an ngei ti lai lo tiah tuanvo ngeitu sin in thawng kan theih.
Atu bantuk in sipin upadi zong ah a um pin ah kutzungthiam hna nih license ngei lo in inn an sak caah phungning in kutzungthiam paoh minung pakhat cio License May thla chung ah an tuahpiak dih hna lai tiah theih a si.
“Sipin upadi ning in kutzungthiam paoh minung pakhat cio inn saknak nawl license an ngeih hnu lawng ah rian an tuan cang lai. April thla chungah tuahpiak ding a si nain relrem lonak a um caah May thla chungtu ah kan tuahpiak dih hna lai. Hi license tuahnak ah tangka tlawmpal cu a herh ko nain tangka cu a bia pi lo, phungning in license an ngeih i sipin nih inn saknak nawl rikhiahmi le pekmi ning paoh in an sak kha a biapi. Cu license cu Card in kan tuahpiak hna lai i rian an tuannak paoh ah an i fawih cang lai” tiah sipin Committee Pu Nawl Ceu nih TCP ah a chim.
Inn ngeitu hna nih sipin ah inn saknak nawl an pek hna ningin a sak lo caah a tubantuk in inn saknak ri lonh lo nak ding caah kutzungthiam hna nih an zulh in an sakpiak cang hna lai.
“Inn saknak nawl (soh-mingh) an hal bak in mi cheu cu inn tung a dirh colhmi an um. Sipin nih nawl kan in pek cang timi ca kan pek hna hlan ah inn an sak tawn caah a tu kutzungthiam hna zong license kan pek hna lawng bak in inn nan sakpiak cang hna lai tiah kan chimh hna lai. Inn saknak nawl kan pek hna ning sa lo in lam lei le inn hmai deuh ah pe khat cu an fong peng. Cu caah kutzungthiam hna license kan pek hna hnu cun ri kan suai ningtein anmah hrimhrim nih an sakpiak cang hna lai” tiah Pu Nawl Ceu nih a chim.
Hi license tuah tikah tlangau le sangchung khuabawi sin in theihternak an tuah hnu ah kutzungthiam hna nih sipin sinah phungning in inn saknak license tuahpiak an si te lai. Mah an license cu May thla in September thla chung tiang lawng hman khawh a si lai i an license cu kum khat voikhat (tat-tann-too) piak an si te lai tiah kan theih.
About The Author
