Thantlang Kutzungthiam License Tuahpiakmi Minung Pakhat Nih Ks. 25,000 Hrawng An Dih Lai
Salai Elvis| 2018 May 29| Thantlang khuachung sipin tawlrelnak in kutzung thiam (let-ta-ma) hna cu License tuahnak ding caah minung pakhat nih ks. 15000 in 25000 tiang dih in an tuahpiak hna lai tiah theih a si.
Hi License tuah ning cu phunthum ah thenpiak an si i nikhat ah 1,000 in 10,000 hlawh a lami cu minung pakhat nih 15,000, nikhat hlawh ah 11,000 in 14,000 a lami hna caah 20,000 le nikhat hlawh 15,000 cung paoh aa hauhmi kutzungthiam caah minung pakhat nih 25,000 dih in License tuah an si lai tiah sipin nih ri a khiahpiak hna.
May 29 ni Town Hall ah Thantlang khuachung kutzungthiam hna cu auh dih an si i License tuahning, tuah a herhnak kong le tangka a herh dingmi zat le zulhphung hna chimhruahnak zong an tuah cang i June 4 (nikhat ni) sipin zungah Card an pek hna lai. License ngei lo in inn a sami hna cu nikhat ah 10,000 in 50,000 tiang tandat khawh an si tiah theih a si.
Hi License tuahnak chungah kutzungthiam tang i rian a cawngmi (ni hlawh pek lo mi hna) le khua dangin inn sak a rak bawmmi chungkhat hna le kutzungthiam tang ah nu hna rian a tuanmi tah License tuah an hau maw? timi biahalnak a um.
Cu biahalmi cu sipin Committee Pu Nawl Ceu nih, “Khuate lei in chungkhat rianbawmh dingin a rami hna, kutzungthiam tangah rian a tuanmi nu le inn sak a cawngmi hna a fawinak in sobul le hluah aa tlaihmi paoh License tuahter dih an si lai. Asinain mah inn sa i mah chungkhar lila cu License tuah a hau lo” tiah lehnak a tuah hna.
Phung ning in License kan tuah cang lai va si kaw kutzungthiam cu thih le nun ri ah a ummi kan si tikah kan i hliamkhuai le thih lohnak kan tonsual ah tah liamhrulhnak nan ka pe lai maw? Inn saknak thing kongah sipin nih cahpiak in nan kan tawlrelpiak kho lai maw? timi biahalnak an tuah than.
“Sipin cu aa-ma-khan zung lei kan si lo caah hliamkhuainak le fahnak nan ton sual ahcun kan in liamhrulh kho hna lo. Inn saknak thing zong sipin nih cahpiak khawh a si lo penguk zung le thingram zung lawng nih nawl an ngei” tiah Sipin Cimmittee pakhat nih lehnak a tuah hna.
Thantlang khua chungah kut zungthiam minung 150 hrawng an um tiah theih a si.+++
About The Author
