Thantlang Khuachung Motor le Cycle Khawndennak A Zor Deuh Nakhnga Ninga Chung Ralrin Peknak An Tuah Cuahmah

0

Salai Elvis| 2018 May 29| Thantlang khuachung motor le cycle i khawndennak a zordeuh nakhnga le zulhphunng ning tein motor le cycle an mongh nakhnga mizapi sinah ralrin peknak cu May 29 in an thawk i ninga chung an tuah tiah theih a si.

Motor le cycle khawndennak a chuah lengmang tikah a nunnak a liam mi tiang an um caah a tubantuk in penguk zung, palek, motor PK, meithatnak zung, sangchung khuabawi hna le tuanvo ngeitu hna nih mizapi sinah ralrin peknak le chimhhrinnak an tuah hi a si.

“May 29 ni thok in ninga chung pehtlai in motor le cycle khawndennak a tam ngai cang caah, tuanvo ngeitu hna nih mizapi sin ah ralrin peknak kan tuah lai. Mah le kalnak lam te le lam zulhphung ning tein an kal nakhnga le rangtuk in motor le cycle mongh lo ding. Cycle luchin aa chinh lo mi zong kan tlaih hna i inn ah lukhuh kan lakter asiloah kan cawkter hna hnu ah kan thlah than hna. Dantatnak cu a um lai lo. Cu bantuk in motor mong mi a bikin SKAT motor hna zong (driving license) an i ken lo ahcun kan tlaih hna i an motor cakhenh ah a sen a si lai, (khah-khuai) license in mongh khawh a si lo nak kong zong chimh cawnpiak an si” tiah pengukzung bawi U Swam Htet nih TCP ah a chim.

“Hi kan tuahnak thawngin cycle le motor mong zong an i ralring deuh lai. Abik in SKAT motor mongtu hna zong khuachungah rangtuk in an kal ti nakhnga lo ralrinpeknak ngei chih an si. A tu lio hi sianginn kai a za cang lai i sianginn pialnak lam kam kipah motor PK chiahpiak ding in timhtuahnak kan ngei” tiah sangthen No.2 khuabawi Pu Val Hlei Thang nih TCP ah a chim.

2018 May thla dih lai tiang motor le cycle khawndennak voi 6 a chuak cang tiah palek zung cazin ning in theih a si.

About The Author

Na ruahning rak langhter ve.. (Leave a comment)

%d bloggers like this: