Thantlang Khuachung Sa Thahnak License Thlaruk Chung Minung Pathum Nih An Tlaih Lai

0

Salai Elvis| 2018 March 15| Thantlang khuachung market sa thahnak License hmun hnih cu thlaruk chung ah minung pathum nih an tlaih cang lai tiah theih a si.

March 13 sipin zung ah License cawkzuarnak an tuahmi chungah a tu bantuk in April thla in September thla tiang Pi Khual Dim, Pu Calvin le Pu Khua Tin Lal nih Sa thahnak License cu an tlaih lai. Sa thahnak then hmunkhatnak Vok thahnak license cu Pi Khual Dim nih ks. 6,500,000 in a tei hna (minung 4 nih an zuamcawh). Sasen license cu Pu Khua Tin Lal nih ks. 3,375,000 in a ngah (zuamcawhtu a ngei lo). Sathahnak hmun hnihnak sianginn sang ah Vok lisence cu Pu Calvin nih ks. 3,300,000 in a tei hna (minung 3 nih an zuamcawh).  Sasen license cu Pi Khual Dim nih ks. 1,425,000 in a ngah (zuamcawh tu a ngei lo).

 

Cu pin ah Saphaw license a hmutu Pu Khua Tin Lal nih ks. 230,000 in a ngah (zuamcawhtu a ngei lo). Khuachung motor le cycle luhman (bi-khunn) license cu Pu Thla To nih ks. 350,000 in a ngah zuam cawhtu a ngei lo). Nichiar thilzuar (ngacar, thingthei tbk…) le sipin nih tlaihmi chungah dawr zuarmi nungkhuai haltu license cu Pi Sung Tlem nih ks. 750,000 in a ngah (zuamcawh tu a ngei lo). Mah pin ah Hnaring khua caah vok thahnak License zong cawkzuarnak an tuah colh ve lai tiah theih a si.

 

Thlaruk caah sipin nih cawkzuarnak ri a khiahmi cu; Sa thahnak hmun khatnak ah vok license cu ks. 5,300,000 le Sasen license cu ks. 3,275,000 an si. Sathahnak hmun hnihnak Vok license cu ks. 2,005,000 le sasen license cu ks. 1325000 a si. Saphaw ks. 200,000, bikhuun ks. 345,000 le nifatin dawr nungkhuai hal ding ks.325,000 an si i mah ri khiahmi leng a tambik paoh License pek an si.

 

Hi license cu 2018 September thla tiang lawng tlaih a si lai i October thla in 2019 kumkhat ca tiang cawkzuarnak an tuah than te lai. Hi chungah zulhphung le sacuai tlin lo ah cun phungning in dantat le an license tiang an chuh than hna lai tiah theih a si. +++

About The Author

Na ruahning rak langhter ve.. (Leave a comment)

%d bloggers like this: