Thantlang Khuachung TCF Nih Thlankhur Tuah Cia In An Zuar Lai
Salai Elvis| 2019 January 29| Thantlang khua cu khuapi he aa tlak ningin thlankhur cawhcia in chiah i a dih mi ning tein chiat ni a tongmi chungkhar lei nih liam ding in Thantlang Christian Fellowship (TCF) le Thantlang Youth Association (TYA) i bawm in thlan cawh cia in an zuar lai tiah kan theih.
Hi kong he pehtlai in sangthen cheukhat hna nih thlan tuah cia zuarding cu mino cawlcanghnak le i funtomnak zong a rawk deuh kho sual tiah a ti mi zong an um nain mizapi hnatlak ningin thlan tuah cia si ko seh tiah January 27 ni ah Sangchung chiatthatbu, TYA, TCF upa te le tuanvo ngeitu hna biakhiah nak an tuah than hi a si.
“Thlan tuahcia ding kong he pehtlai in TCF le TYA i bawm in tuah ding a si. A tlangpi cun TCF lei nih tangka thazaang deuh le riantuan ding cu TYA an si ko lai. A tu lio thlanmual hi chun hmanh ah hin a rocar tuk i ningti in a um. Cucaah cun thlanmual hi pangpar dum bantuk hna in kan ser kho hnga maw tiah ruahnak a um. Hi kongah tha tein ruah i sipin lei Engineer nih Master Plan kha kan suaipiak seh law zohdawh deuh le ningcang deuh in tawlrelnak um seh tikhi kan i tinhmi cu a si. Thlan hi zeizat in dah kan zuar lai ti cu a fiang rih lo, a riantuan nak nih a ngeih te lai i rianzong zeitik in kan thok lai a fiang rih lo. TCF cu chiatni thatni i zohkhenhnak a si ko caah amiak laak lo ding in kan ruah ko” tiah TCF Chiarman Pastor Duh Sang nih TCP ah a chim.
Hi kong cu TCF nih 2018 kum Siminar an rak tuah lio in a rakchuak mi biatung a rak si nain sangchung tuanvo ngeitu le mino hna i funtom than hnu ah a tubantuk zapi hnatlak nak in bia an chah hi a si. Chungkhar lei nih thlanco rawl i peknak kong, mino hna zanvar (dei) hnu in thlan cawh nak kongah harnak an ton ning, zarhpi ni he aa ton caan ah mino hna caah dawnkhan tu a si caah a tu bantuk in thlan cawh cia zuar an timh hi a si.
A tu bantuk in thlan i cawh cia nak cu Sianginn sang nih a luancia kum hnih hrawng in an rak thok hmasa mi a si. A tu lio Thantlang khuachung ah Thlan hmun 3 ah a um i TCF nih thlanlung cung i Cuaipia phah zong tha an pe lo tiah kan theih.
About The Author
