Thantlang Khuachungah Bogyoke Aung San Milem An Tuah Lai

Salai Elvis| 2018 April 11| 2018-2019 kum budget chung Thantlang khuachung ah Kawlram pi luatnak a kan hmuhtertu Bogyoke Aung San milem tuah dingin timhtuahnak an ngei tiah thawng kan theih.

Hi milem cu Sipin budget sing 300 dih in tukum April in September thla chung ah tuah dih dingin tender an auh lio a si.

“Kan ram luatnak a petu Bogyoke Aung San philhlonak ah tuahtimh a si. Thantlang cu khuapi pakhat a si tikah hi bantuk hi a um awk a si ko tiah kan ruah. Khoika hmun ah dah chiah in tuah a si lai timi cu a fiang rih lo” tiah Thantlang penguk zungbawi U Swam Htet nih TCP ah a chim.

 

“Amah dangtein pangpar dum tuah i chiah ding asinain Thantlang cu pangpar dum kan ngeih rih lo caah khuachung lam tonnak pakhat khat a thatnak ah kan tuah te ko lai. Tender an hmuh in rian an thok colh lai i tukum September thla hlan ah dih dingin an tuah lai. A muisam suai ding le zeitluk dah a hmet ngan si lai ti mi cu budget hoih in riantuantu hna nih an suai te ko lai” tiah sipin committee Pu Nawl Ceu nih TCP ah a chim.

Atu bantuk in Bogyoke Aung San milem hi Thantlang khuachung ah avoikhatnak an tuah a si lai tiah theih a si. +++

Na ruahning rak langhter ve.. (Leave a comment)

%d bloggers like this: