Thantlang khuacung i SAC ralkap sakhaan le palik sakhaan kah an tong

The Chinland Post | 2022 May 30 – Chin ramkulh, Thantlang khua chungah a ummi SAC ralkap sakhaan le palik sakhaan cu CDF-Thantlang le CNA phufonh hna nih May 27 ah an kah hna.

May 27 zaanlei sml 5:00pm in zaan sml 9:00pm tiang Thantlang khuachung ah a ummi SAC ralkap pawl le CDF-Thantlang, CNA karlak ah kahdohnak a chuak i SAC ralkap 6 an thi. Mipi hriamtlai phu hna nih hliamhma tuar lo tein an kirtak khawh hna tiah CDF-Thantlang thawngthanhnak nih May 27 ah a rak langhter.

Cubantuk in, May 23 zongah Thantlang khuachung ah sml 2 leng kahdohnak a rak chuak i SAC ralkap 6 an thi i 8 nak tlawm lo nih hliamhma an tuar i CDF chungtel 4 nih fak tuk loin hliamhma an tuar ve tiah theih a si.

May 23 ah a chuakmi kahdohnak ruangah Thantlang khua cu SAC nih an khangh ṭhan i inn tampi a kaang nain cazin bel fiang tein kan laa kho rih lo tiah CDF-Thantlang thawngthanhnak nih a chim.

SAC ralkap nih a luancia 2021 September thla thok in Thantlang khua cu a khangh lengmang i 2022 May 23 tiang telh in voi 28 an khangh cang i inn 1,000 leng a ciam cang tiah theih a si.

Na ruahning rak langhter ve.. (Leave a comment)

%d bloggers like this: