Thantlang Khuanu/pa Nih Vice President Sin An Halmi Dinti Laknak Sing 510 A Bawmh Colh Hna
Salai Elvis|2019 April 29| April 28 ni ah Vice President Pu Henry Van Thio cu Thantlang khua a rak phan i khuanu/pa nih thil phunli an halmi chungah Vomva dinti laknak ding caah sing 510 bawmhnak a pek colh hna tiah kan theih.
“Thil phunli kan halmi chungah Sianginn sang hmunthar ummi hna caah Vomva dinti lapiak dingmi cu sing 510 a kan bawmh colh. Hi bawmhmi ah pape cawknak ca le ti-inn gallon 10,000 tlum saknak ca aa tel chih. Rian zong tuan ah thok colh dingin Teder auh a si ko lai. Cun zuu deu (a-tuh) zuarnak kong zong tuanvo ngeitu hna nih tha tein zohfel piak ding, khuakomh (oh-suh) kongkau tu cu duhsah in tawlrel te ding kong le Siang Cachimtu saya/ma te kong zong a ralaimi May 2 ni ah rampi huap in siang cachimtu saya/ma thlenremhnak a tuah te lai” tiah khuanu/pa tuanvo ngeitu Pu Lawm Bik nih TCP ah a chim.
“Vomva dinti hi sianginn sang hmunthar ummi ca lawngah hman khawh a site lai. Cu hna caah a dangtein rak zohcia cangmi a si. A ruang cu cunglei deuh ah cun ti a kai kho lai lo. Cun sianginn cachimtu zong Thantlang peng ah 400 an bau ti cu an theih cia dih ko, nain theihternak kan tuah than hna khi a si” tiah Pu Lawm Bik nih a chimchap.
Avoi linak Vice President cu Thantlang khua a rak phan i khuanu/pa nih thil phunli an hal mi chungin pek colh awk a tha mi cu a tu bantuk in a leh hna hi a si.
About The Author
