Thantlang Khuanu/pa Nih Vice President Sinah Zuu Deu Kong Telh In Thil Phunli An Hal Lai

Salai Elvis| 2019 April 28| Rampi Vice President Pu Henry Van Thio cu April 28 zanlei suimilam 7 tluk ah Thantlang khua avoi linak a rak phan. Tutan ah khuanu/pa nih thil phunli an hal than lai tiah tuanvo ngeitu pakhat nih The Chinland Post ah a chim.

“Tutan ah Thantlang khuanu/pa nih thil phunli hal kan i tim. Cu hna cu;

1. Thantlang khuachung ah Zuu deu (a-tuh) rumro a lut i minung zong kan thi tuk caah hi kong hi biatak tein tawlrel piak ding.
2. Sianginn cachimtu saya/ma minung 400 renglo an chambau rih caah chiahpiak ding,
3. Khuakomh (Oh-suh) thlenremhnak le chapnak kongkau le
4. Sianginn sang hmunthar ummi hna caah Vomva dinti an zohpiak cang hna mi kong pehzulh in tawrelpiak ding kong hna an si” tiah khuanu/pa tuanvo ngeitu Pu Lawm Bik nih TCP ah a chim.

“Tutan Thantlang khua a tlawnnak chungah mizapi he tonbiaruahnak a um lai lo i thil phunli kan hal ding mi cu Sakremhnak zung (Guest House) a riahnak dingah khuanu/pa, Pastor te le zungriantuan hna ton nak a um lai i cu hmun ah chimphuan kan timh” tiah a lunglei upa nih a chim.

Pu Henry Van Thio, a nupi Dr. Anna Sui Hluan, mirum Daw Tinh Tinh Lwin le rampi huap in tuanvo ngeitu hna nih an rak zulh.

“April 28 Thantlang khua ah a riak lai i April 29 zinglei ah Daw Tinh Tinh Lwin nih Hotel a sak mi zohfelnak, Sii-inn ah thingkung cinnak, Sport Center sak lio, AC Nylon Kat-ta-za phah mi le Gorvernment Technical High School (GTHS) sianginn saknak ding hmunhma a zoh lai” tiah sangthen khuabawi pakhat nih TCP ah a chim.

April 28 zan Thantlang ah a riak lai i a herhmi hmun a zohfel hnu ah April 29 Hakha ah a riak than lai i Hakha-Taungkhayan lam a zohpah in a kir te lai” tiah lam le sul vuanci Pu Sui Thio nih TCP ah a chim.