Thantlang Khuapi Caah KBZ Nih Bawmhmi Ti Phurhnak Motor Hmanning Biakhiahnak An Tuah Cang

0

Salai Elvis| 2018 March 9| KBZ Bank nih Thantlang khuapi caah ti phurhnak motor pahnih a bawmhmi hna cu zeitindah a hmanning a si lai timi biakhiahnak an tuah hnu ah khuachung tihar mi sang, sii-inn tibantuk ti a pek manh cang hna tiah kan theih.

Hi motor ti phurhnak ningcang tein hman ning zong committee nih biachahnak an ngei cang.

“Tukum chungah KBZ nih Thantlang khuachung caah a kan bawmhmi motor in ti kan pek cang hna. A bik in manlo (free) le a herhnak zawn ah kan hmannak cu nai tan tlangthluan pumpulhchuih zuamnak tuah lio ah ti a harmi hna voili ti kan ngalh hna. Cun tutan Thantlang peng in tanghra camipuai tuah ah a rami pawl umnak zong ah voili tluk ti kan ngalh ve cang hna. Cucaah cun sangchung, sii-inn hna hi man lo (free) in pek an si ko lai” tiah Committee upa Pu Biak Tha Cung nih The Chinland Post ah a chim.

Hi ti phurhnak motor cu a lenglei in hlan duh ahcun tangka in hlan khawh a si nak le khuachung mizapi nih an herh caan ah alak in (free) pek an sinak kong zong a tu bantuk in a chim.

“Company nih anmah riantuannak caah ti an herh i an kan cah ahcun, khuachung lawng ah 50,000 (cu-su bar-ih tiang) le khualeng ah cun a hlat naih ning in a man lak an si ve ko lai. Cu bantuk in khauchung ah thatni puai pakhatkhat (thlacamnak, thih umnak) le chiat ni ah an herh ah cun voikhat ngalh ah 40,000 lak ding in biachahnak ngeih a si. Sangchung mizapi nih ti an herh ahcun man lo (free) in pek an si lai” tiah Pu Biak Tha Cung nih a chim.

Atu bantuk in Thantlang caah KBZ Bank nih ti phurhnak motor pahnih a bawmhmi hna cu Pu Thang Iap (Shan ramkulh zaanglek bawi) nih Thantlang khuapi ti an har a theih tikah KBZ bank a pehtlaihnak hna thawng in hi motor bawmhnak an hmuh hi a si. Hi motor pekchanhnak zong sunglawi ngai in Chin ramkulh cozah lutlai hna le KBZ Director tel in 2017 October 14 ah an tuah tiah theih a si.+++

About The Author

Na ruahning rak langhter ve.. (Leave a comment)

%d bloggers like this: