Thantlang Market Anhringso Zuarnak Hmunhma Abit Tuk Caah An Duhning In Thil An Zuar Kho Lo

Salai Elvis| 2018 May 15| Thantlang khuachung market anhringso a zuar mi hna an um nak hmun a bik tuk caah duh ningin thil an zuar khawh lo pin ah thil phun zong a tling kho lo tiah thawng kan theih.

An thilzuar nak hmunhma a bit tuk pin ah ngunkhuai an pek mi he aa mil lo caah mi cheukhat cu an miak mi zong a tuak huaha lo mi zong an um tiah theih a si.

Hi kong he pehtlai in anhringso zuartu nu pakhat nih “kan thilri zuarnak hmun hi nan hmuh banktuk in pe 5 x 4 tluk lawng a si tikah anhringso phun nga/ruk kan vun chiah le a khat colh, cu tik ah duhning in thil kan la kho lo. A hmunhma hi vunkau deuh sehlaw thilri zong phuntam deuh in kan cah hnga i kan zuar ko hnga” tiah The Chinland Popst ah a chim.

“Ngunkhuai kan pek mi hi sipin ah kumkhat caah minung pakhat nih 5000 kan pek, nichiar sipin market chungah ngunkhuai hal tu (nehsin-ye-koh) nih minung pakhat 1000, ar a zuar chihmi cu ar pumkhat ah 200, nga sa zuarmi si cun cuaikhat 100 in hal a si. Ar sa le nga sa hi nichiar si lo in voikhat a tlun ah cuaikhat le pakhat ca tiin pek an si. Cu tikah kan thilri zuarmi a phun tlawn si, ngunkhuai kan pek mi he cun kan miak mi zong kan tuak lem ti lo/aa then kho lo” tiah anhringso zuar nu tung pakhat nih TCP ah a chim ve.

Atu lio Thangtlang market cu a thar dotthum le cheu in Golden Development Company nih tu kum May thla chungah sing (8000) tluk dih i sak dingin timhtuahnak ngeih a si nain Chin ramkulh cozah le anmah Company kaphnih hna tlak minthut nak nihin tiang an ngeih khawh rih lo caah rian an thok kho rih lo. Atu lio Thantlang market chung thilzuar minung 25 nak tlawm lo an um tiah theih a si.

Na ruahning rak langhter ve.. (Leave a comment)

%d bloggers like this: