Thantlang Market Dawrkhan Ngeitu Hna Thawhvo Kong An Lungtlin Lo Caah Rian An Thok Kho Lo
Salai Elvis| 2019 April 4| Thantlang Market saknak kongah dawrkhan a rak ngei ciacang mi hna nih thawhvo phawtmi kong an lungtlin lo pin ah an duh lo caah a tu ni tiang riantuan an thok kho rih lo tiah kan theih.
Hi Market cu 2019 January thla in sak thok ding a si cang nain Market dawrkhan ngeitu hna nih thawhvo le a man kongkau rikhiahpiak mi duh lo in 2018 December 19 lio ah sipin vuanci sinah ca an tial hi a si.
Mah kong he pehtlai in Market dawrkhan ngeitu pakhat nih, “mah dawr khan hi mah pumpak in cawk le i sak mi a si. Cucaah mah duh in zawrkhawh zong a si. Market saknak kongah Meeting voi tam ngei an kan auh. Market sak nan duh maw an kan ti. Kan duh ko nain Cozah budget tlak lo i kan mah tein tangka thawh in sak cu kan duh lo tiah kan leh hna. 2017 kum ah sipin vuanci, ramkulh sipin Director le Company tuanvo ngeitu hna an rak tlung i meeting an kan auh than mi cu kan sak lai an kan ti than. Sing 8500 in budget suaimi hi dawr khan pakhat ah sing 80 a ciah lai i dawrkhan a rak ngei cia cu a let li/ nga in nan niam deuh lai an kan ti. Let li/nga niam in a si ah cun dawrkhan pakhat ah sing 20 tluk nih a ciah. Dawr ngeitu hna meeting a hnu bik kan tuah mi cu sing 30 cio thawh ding in biachahnak kan ngei. Sing 30 cung a si ahcun kan duh lo, cucaah cun rak kan ruahpiak than u tiin ca kan tial hi a si” tiah Pu Tluang Uk nih TCP ah a chim.
Hi dawrkhan an sak khawh in khan khat sing 80 in zuar i a duh mi paoh nih cawk khawh a si lai an ti. Hmun le dawrkhan a ngei cia zong nih sing 80 in kan cawk a si ah cun kan mah le kan mah (dawr khan a rak ngei cia mi pawl) heih kan i cawk a si than ko ne cu. Cucaah kan duh bak lo” tiah a cunglei upa nih a chim chap.
A tu lio Thantlang Market hmun le dawrkhan a ngeitu hna cu 1989 kum lio ah mah tein vawlei hmun an rak i cawk mi le an mah tein dawrkhan an i sak mi a si i phungning in sipin ah ngunkhuai zong an pek hna. A tulio dawrkhan a ngei mi (an hring so hngak mi chim lo) 32 tluk an um. Mah pin ah Hi hmun lila ah Pension zung zong thial ding a um rih caah nawlngei tu hna kaphnih lungtlinnak an tuah kho ve rih lo tiah kan theih.
“Hi market inn pi cu zeitik dah kan sak lai timi chim awk a tha rih lo. Ramkulh sin ah a inn thehnak nawl kan hal lio zong a si nain nawl an kan pe rih lo. A tu zong hi dawrngei tu lei nih duh lonak caa an chiah mi kongah khua pi meeting kan auh lai kan ti i kan au kho rih lo. Hi market sak khawhnak ding ah hawihlan bik ah Pension zung i thial nak kong zong kan tlamtling rih lo caah zeitik Market kan sak lai a fiang rih lo” tiah sipin Committee Chairman Pu Ram Khar nih TCP ah a chim.
Hi Market sak nak ding caah sing 8500 tluk dih in Global Development Company nih tuanvo lak in le dot thum le cheu hrawng sak ding a si nain dawr ngeitu hna le tuanvo ngeitu hna karlak ah relrem lo nak a um rih caah a tu ni tiang inn an sak khawh rih lo nak hi a si.
About The Author
