Thantlang Market Sa Thahnak License Hohmanh Nih An La Duh Lo
Salai Elvis| 2018 August 30| Thantlang sipin nih tawlrel mi License phun sarih cawkzuarnak cu August 28 ah tuah a si i hi chungah sa thahnak License cu hohmanh nih an la duh ti lo tiah theih a si.
Sa cuai tling tein zuar a si cang lai caah tu bantukin sa a that thingmi hna nih License an lak duh ti lo hi a si ti kan theih.
“Sa thatmi hna nih cuaitling in cun kan ngamh lo ticle 80 in cun kan ngah ko an ti nain, Committee le tawlreltu hna dang nih cuaitling in nan zuar lo cun nan duh le la duh lo le lak lo nan mah nawl a si an ti hna caah an lak ngam lo nak hi a si” tiah Thantlang sipin tuanvo ngeitu pakhat nih TCP ah a chim.
“Sa cuai tling tein nan zuar lai an kan ti caah kan ngamh ve lo, ticel 85 a zuar ding a si ahcun kan lak lai kan ti hna nain cuaitling 100 bak in an ti caah kan ngamh ve lo i Bank ah tangka kan tun ciami le a herhmi theihpinak ca, soknak ca tibantuk kan chiahmi zong kan lak dih than i sa thahnak License kan lak lonak cu a si” tiah thlaruk ca License a la mi Pu Khua Tin Lal nih TCP ah a chim.
Voksa zuar pa khat nih “Vok sum nga khi 330,000 in kan cawk, 380,000 hei chuah u si law vok man kan vun pek a tangmi 50,000 hi sipin ah pakhat thah poah ah 7000, saram zuatkhalnak zungah 7000 le palek sin ah 2000 kan pek i zeihmanh a tang ti lo. Cu pin ah License kan rak lak mi man kha a si rih. Cucaah sa man nih le a kai caah cuaitling in zuar cu kan i keih (mil) lo tuk nak a si” tiah vok thahnak License ngeimi pakhat nih TCP ah a chim.
Atu bantuk in License a la mi an um lo caah a voi hnihnak sipin nih hnu bik September 4 tiang fakthanh an tuah than lai i a sok tu an um rih lo ahcun ramkulh sipin lei an tlangtlak hna ning in an tawlrel cang lai.
Thantlang market sa thahnak cu April in September thlaruk chungah minung pathum nih License an tlaih i tu kum October in 2019 September thla kum khat ca chungah cuaitling zuar dingin sa thahnak License a la duh mi an um ti lo. Atu lio sa man cu vok sa cuai khat 7000 le sa sen 8000 in zuar a si.
Kum khat caah cawkzuarnak License sipin nih ri a khiah ning cu sa sen hmunkhatnak 6,750,000 le hmun hnihnak 2,850,000 Vok hmunkhatnak 11,200,000 le hmun hnihnak 6,600,000, saphaw License 460,000, khualuh man bi-khun 700,000 le nichiar sipin nih tlaih mi dawr ngunkhuai 1,500,000 an si i cawkzuarnak an tuah mi chungah nichiar sipin nih tlaihmi ngunkhuai haltu pakhat lawng nih a hmun tiah theih a si.+++
About The Author
