Thantlang Market Thilzuar December Thla Dih In An I Thial Cang Lai

0

Salai Elvis| 2018 November 15| Thantlang khuachung Myomah Market cu a thar sak ding a si cang lai caah tukum December thla dih in hmun dang ah an i thial chung lai tiah theih a si.

Hi kong ah market chung thilzuar le sipin cu November 13 ah tonnak an ngei i hmunkhat te ah chiah dingin hnatlaknak an ngei nain caankarlak Matket hmunhma an hmu rih lo.

“Market chung thilzuar hna he tonnak kan ngei cang. Kanmah duh ahcun tuan ah i thial hna seh law kan duh nain thilzuartu hna nih December thla chung hi kan thil manh lio caan te a si caah kan ngang ko u law December thla dih tu in hmun dangah thialter dingin hnathlaknak kan ngei. Cu si caah caankarlak market hmun kan zoh tikah sianginn sang BEHS No.1 sianginn pawng rawn kam (Tlangbo) ah khin a rembik le a luatmi a tang cang caah sianguk bawi kan chimh tikah sianginn Committee le tuanvo ngeitu hna he meeting an tuah hnu ah bia an kan fianh than ve te lai. A tuni tiang a hmunhma a fiang rih lo” tiah sipin Committee Pu Biak Tha Cung nih a chim.

Hi chungah annhringso a zuarmi ca lawng hmunhma kawlpiak an si lai i anmah tein caankarlak an umnak ding dawr zong an i sak lai. Eidin dawr tuahmi tu cu anmah tein dawrkhan an i kawl lai. Sathahnak zong sianginn sang sathahnak hmun ah an i thial ve lai” tiah a biapeh ah a chimchih.

Thantlang market cu a thar in Global Development Group nih 2019 kum January thla in an sak cang lai. Hi Market muisam suai chung mi ah dotthum le cheu a si lai i a tang bik ah motor 20 tluk chiahnak hmun aa tel chih lai. A chunglei ah khaan 100 tluk a um lai tiah theih a si.

About The Author

Na ruahning rak langhter ve.. (Leave a comment)

%d bloggers like this: