Thantlang Mei Zung Le Meithahnak Zung Nih Ralrinnak Nawlchuah Mi A Zul Lomi Fakpi In Dan A Tat Cang Hna Lai
Salai Elvis| 2019 May 30| Thalcaan a si bantuk in le khua caan a hman lo caah Thantlang khuacung mizapi nih mei ralrinnak kongkau zulhphung cu Mei zung le mei thahnak zung nih an chuah i nawl a zul lo mi paoh cu fakpi in dantat an si taktak cang lai tiah Thantlang meithah zung lutlai nih TCP ah a chim.
Hi ralrinak ca chungah zulhphung 23 tluk a um i dawr kip le mizapi an tam deuh nak hmun kip ah tar a si.
Nawl an chuahmi chungah a bik in, inn pawngkam hnawmtam thianh dih ding, a dang tein ti khonnak (ti inn) ngeih ding, ralrinnak ah a herh mi Arhlei, thet-se tibantuk tling tein chiah ding, zinglei suimilam 6-10 zanlei 4-8 tiang lawng tappi, vokrawl chumhnak tibantuk mei kau ding, zalam cungah kuak zuk lo ding, Electric hri a hlun tuk mi thlan ding le ralring tein Electric mei hman ding, Mei Plug kua pakhat ah tamtuk sawh lo ding, alhhang (Desel/datsii) inn chungah chiah lo ding le a pawngkam ah mei tek tibantuk zong chiah lo ding, pakhatkhat thil a can sual (Emergency) lio ah Ph: 191 ah chawnh colh ding le a dangdang mei kongkau ah ralrinnak a kong 23 nawl a chuah.
“Hi bantuk ralrinnak hi voidang zongah tlangau le mizapi sin ah ralrinnak tete kan tuah lengmang. Tutan zong Biakinn kip ah thawngthanhnak kan tuah lai. Cun dawrkip le mizapi hmuh khawhnak ding in ca kan tar. Tutan nawlchuah mi a zul lo paoh cu fakpi in dan kan tat taktak cang hna lai. A tu zong innkip ah lungthu mei a kau i a caan chungah a hmit lo mi pawl riantuantu hna nih zohfelnak tuah in kan i chok thluahmah cang” tiah Thantlang meithahnak zung lutlai Pu Sui Cung Lian nih TCP ah a chim.
Tukum April thla chungah ah Thantlang khuachung inn khat le Hmunlipi khua ah inn thum kanghnak a chuah hnu in tuanvo ngeitu zung hna nih a tubantuk in fakdeuh in rengh le nawl a chuah mi a zullo paoh fakpi in dantat ding in nawl a chuah hi a si.
About The Author
