Thantlang Meizung Nih Meter Box Lo Mei Hmangmi Tel In Mizapi Sinah Ralrin Peknak An Tuah

Salai Elvis| 2019 February 5| Thal a chuah pah cang caah mei kongah ralrinnak le a bik in Meter Box lo in mei hman lo ding kong Thantlang Meizung nih Thantlang khua Khrihfa bukip ah theihternak le ralrin peknak thawngthanhnak an tuah tiah kan theih.

“Meter box a sok ko i a hmu rih lo mi hna cheukhat nih an inn pa mei kha a thli in an i pehmi kan theih hna i dawng hnih hrawng cu kan chahpiak cang hna. Cun mah nawl in mei a tuahmi le Meter box lo in mei an hman sual i kan theih sual hna ah cun inn chung na hman mi pawl zoh (wan-a) zoh in dantat an si lai. Tahchunhnak ah Ks. 50,000 in sing 3 tiang dantat khawh an si. Cucaah dantat lo nak ding caah phung rak kan zulhpiak hna seh” tiah Thantlang meizung lutlai Pu Maung Hlun nih TCP ah a chim.

Mei ralrinnak kong he pehtlai in Khrihfabu kip Biakinn chung thangthanhnak le ralrin peknak zong February 3 ah an tuah. Hi chung ah ‘Lo kal, pumh kal lai le leng chuah lai caan paoh ah mei hmih ta dih ding (ka hmit cang maw? tiah lung aw-tawm in na um sual ah cun kir than law va zoh than), unit a lakka i a tlau lonak ding caah Meter a ngei lo mi nih mei hman lo ding, Meter box a sok ko nain a ngah kho rih lomi hna na inn pa mei hmang lo ding, Inn chung mei hmannak kongah; coka na um lio ah innpi lei mei vang hlah, a herh na ti tik lawngah hman ding. Cun nangmah nawl in mei tung kai, le innchung innleng mei hri tuah hlah. Mei hri chia deuh le aa pehmi a tammi pawl cu Quality tha mi mei hri in thlen ding timi pawl theihternak a tuah hna.

Meitha hman ningin mei man lak ning cu Unit 1 in 100 tiang fang 35, Unit 100 in 200 tiang hman ah cun fang 40 le Unit 200 cunglei hman ah cun fang 50 lak ding le inn chung hman mi Meter box in pakhatkhat tangka hmuhnak caah riantuanmi nih Unit 1 in 500 tiang fang 75 le Unit 500 in cunglei paoh ks.100 tiang lak a si tiah kan theih.

Atu lio Thantlang khuachung ah inn 2000 leng a um i hi chungah Meter box hmangmi inn 1600 an si i Transformer 17 a um. Atu lio an hmanmi cu Ma-ha-dat line Falam in pekmi 11Kv a si i Thantlang khuapi nih mei an hman cem ah 1MW hrawng lawng an hman tiah kan theih.

Na ruahning rak langhter ve.. (Leave a comment)

%d bloggers like this: