Thantlang Mizawpa Hakha Siizung Ah An Thial Lai

TCP-Thantlang|16 May 2020| May 16 ni ah Malaysia in Thantlang ah a raktlung mi kum 32 pa sin ah COVID-19 zawtnak hrik hmuh a si, mah mipa cu thilri a tlamtlinnak Hakha siizung ah thial ter colh dingin an timhtuah lio a si tiah kan theih.

“Hakha ah kan thial lai, a ruang cu Thantlang nak in Hakha siizung cu a tlamtling deuh mi a si. A tu hi Hakha lei he kan i pehtlaih lio a si. A si khawh chungin tuan ah thial kan duh ko.”tiah hi zawtnak kong he pehtlai in chimphuannak nawlngei Thantlang siibawi Van Lian Hum nih TCP ah a chim.

Amah he telh in minung 4 hna cu swab kuat an si, cu chungah minung 3 cu Negative an si i a mah pakhat lawng Positive a si tiah kan theih.

“Malaysia in Thantlang khua a phak hi a ni linak a si i Malaysia in a tlung timi minung pahnih an si. Malaysia in Yangon in khoika hmanh tang lo in cozah tawlrel piaknak in an vun lanhter colh hna mi a si caah thinphan awk cu a um lem lo.”tiah a cunglei upa nih a chimchap.

Atu lio Thantlang khua ah Quarantine chiah mi minung 36 hrawng an um nain zawtnak ngeih le ngeih lo chek ding an um ti lo. Atu Thantlang ah zawtnak an hmuh mi pa hi a ngandam ko tiah theih a si.