Thantlang Motor PK Nih Mi An Tlaih Ning Hna In Biaceih Zungah An Chuahpi Hna Lo
Salai Elvis| 2018 January 18| Thantlang khuachung motor PK nih phungning lo in cycle le motor aa cit i tlaih mi hna cu an tlaih ning zat in biaceih zung ah an phakpi hna lo tiah thawng kan theih.
“An tlaih ning hna hi mizapi nih theih dih a si ko, December thlachung hrawng kha cu Laipawng lungdonh hna ah mi a bawh in an bawh hna. Mi cheukhat tlaihmi hna cu zulhphung zullo deuh cu an si ko lai a fiang ko. Asinain phungning tein an tlaihmi hna a si ko ahcun biaceih zung le phungning tein zungah an chuahpi hna awk a si” tiah upa pakhat nih a chim.
“Kan dawr pawng ah hin minung cu an bawh tawnnak si kaw, ka hmuh ningah nikhat ah a tlawmbik minung 5 cu an tlaih peng hna zungah an kalpi tak hna maw ti cu ka hngal lo” tiah nutung pakhat nih TCP ah a chim.
2018 January 15 tiang biaceih zung ah an phanhpi mi hna minung 13 lawng an si rih tiah theih a si.
“Hi kong ah motor PK nih an tlaih tik hna ah an tlaih hna nak hmun ah i rem hlah u, biaceih zungah phungning tein i remnak tuahkhawh a si ko. An tlaih hna nak hmun ah an rem tikah an tlaihmi hna le a tlaitu hna zong palhnak a tanhmi an lo veve. A hmun ah an i rempeng ah cun an lem hna lai. Cucaah biaceih zung hi zeidah a si i palek zung hi zeidah a si ti zong hngal hna seh” tiah Thantlang biaceih bawi Richard Kyaw Zin Oo nih TCP ah a chim.
2017 kumkhat chungah Thantlang motor PK nih phungning in biaceih zungah an chuahpi mi hna minung 309 an si i hi chung ah August thlachung ah minung 2 lawng biaceihzung ah phakpi an si. November thla ah hin a tamcem zungah an chuahpi mi hna minung 58 an si. Cycle cit nak zulhphung a buarmi cu luchin chinh lo ah minung pakhat 30000 le cycle number a benh lo mi 100,000 dandat khawh an si tiah 2015 motor/cycle upadi ningin theih a si. +++
About The Author
