Thantlang Nih Ti Le Mei Bawmhnak Kan Hmuhcia Cang Caah Kan Herh Ti Lo; Pu Ram Khar

0

City Hunter| 2018 April 25| Thantlang ah Bogyoke Aung San milem chiahding, tohdingmi kong he pehtlai in Thantlang Sipin Committee haotu ton biaruahnak ngeih lio ah ‘Thantlang nih ti le mei bawmhnak kan hmuhcia cang caah ti le mei bawmhnak kan herh ti lo’ tiah The Chinland Post ah a chim.

Thantlang ah Bogyoke Aung San milem chiahding le tohdingmi kong ah ramchung ramleng Chinmi tampi nih Aung San milem nakin zeidang thanchonak tu kan tuanpiak deuh uh tiah social media ah an duhnak an langhter cio. Cu bantuk in cheukhat nih Aung San milem chiah le toh hi a tha, Bogyoke hi upat awktlak a si a timi zong an um ve.

Bogyoke milem nakin khua caah a thahnem deuhmi ti, mei le lam hna tuah deuh hna seh law a tha deuh lai tiah an chimmi kong ah hiti hin The Chinland Post ah a chim.

“Mei cu kan herh ti lo 2018-2019 kum ah maha-dat line sing 5000 an kan pek ko, atu kum May thla dih hlan ah riantuan an dih cang lai. Ti kong ah Vice President sin ah kan hal cangmi a si, thla 11 budget chungah minute pakhat ah Gallon 300 tluk a chuakmi an kan pek fawn lai. Cucaah cun ti le mei cu hmuh cia ah kan i ruah. Khauchung lam luti hor zong 50 renglo kan tuah ko. Cun inn karlak lam zong Concrete lam in kan tuah, khua thanchonak kong ah cun kan i zuam i kan i tuansek ve ko. Cucaah Bogyoke milem zong a herh thiam ve ko. Kawlram chungah Bogyoke milem tuahnak ding caah cozah nih budget a pek hna ti cu a um bal theng lo. Kanmah Thantlang lawng kan si lai, khua dang an tuahmi hna cu a lenglei sponsor in an tuahmi a si” tiah Thantlang Sipin Committee Haotu Pu Ram Khar nih a chim.

“Bogyoke milem cu pangpar dum caah tiin ekah-5 kan rak chiah chungmi khualuh hauka chak deuh teah khin a um i khi hmun ah amah milem zong kan chiah ko lai. Pangpar dum caah vawlei cu kan ngei nain zeihmah kan tuah bal lo caah a si. Atutan sing 300 kan hman dingmi hi amah milem caah sing 100 lawng kan hman lai i a tangmi sing 200 cu a lam cawhnak le pangpar dum hmunhma tuahnak caah kan hman lai i pangpar dum ca taktak cu a dang tein hmaikum ah budget ngan deuh kan hal than lai. Hi milem tuah timhmi cu sing 100 man a san pe 6 hrawng a si lai. Tender in auh cia a si lo, a tu ni tiang a sokmi zong an um lo tikah kanmah sipin nih kan tuah te ko lai. Hi kongah ramkulh cozah nawl peknak aa tel lo i kanmah duh tein kan halmi hna a si” ti zong The Chinland Post ah a rak chimchih.

Milem ai-awh ah khua thanchonak tuahpiak ding le mizapi lei chimhruahnak le hnatlaknak laakpiak ding in Chin ramkulh Sipin minister sin ah Thantlang Sianghleiruun Chungkhar (TSC), Thantlang Youth Association (TYA) le Chin Family Group nih capek in an hal. Hi bu pathum hi Thantlang khuachung zatlaang phu ah a nganbik le khua a huaptu bu an si.

Ramkulh sipin minister sin ah ca an chiahmi cu; ‘Bogyoke milem cu Thantlang khuachung lamton hmun pakhat khat ah kan chiah lai tiah kan theihmi thawngpang le milem sernak ding caah ks. sing 300 a dih dingmi ai-awh ah khuachung nih kan herh deuhmi lam, mei, ti le thianhlimhnak caah nan kan tuahpiak naklai, hi milem ser lo awk a tha lo nan ti si ah cun rian thok hlan ah “United Nations Declaration on the Rights of Indigenous Peoples (UNDRIP) poh-ma (19) le a tu kawlram nih hman lio mi tlangcung mi kilvennak upadi (2015) pohmah (5) ning in mizapi/khuapi lei chimhruahnak le hnatlaknak um hnu lawngah nan kan tuahpiak naklai kan in nawl hna’ ti a si tiah kan theih.

About The Author

Na ruahning rak langhter ve.. (Leave a comment)

%d bloggers like this: