Thantlang Palek Quater’s Inn Hnih Sing 457 Dih In An Sakpiak Hna Lai

Salai Elvis| 2018 July 3| Thantlang khuachung cozah riantuantu hna umnak inn (quarter’s) vialte lakah palek umnak inn a chia bik a si caah 2018-2019 tangka kum ah inn hnih saknak caah rampi buget sing 457 dih in an sakpiak hna lai tiah theih a si.

Hi inn an sak dingmi cu chungkhar he a ummi caah inn khan 6 ummi dot hnih pe 126 x 35 saknak caah sing 366 le palek bawi (a-za-sih)umnak inn dot khat saknak caah sing 91 dih in Oh-chin- Thitsa Company nih tukum chungah an sak lai.

Hi inn sakpiak dingmi kongah Thantlang peng Hluttaw palai Pu Bawi Khing nih 2017 kum lio ah a halpiakmi hna a si i a tubantuk in 2018-2019 kum ah sak dingin an pek hna hi a si.

“Hi kongah Hluttaw ah ka rak hal ciami chungin biahalnak ka tuah than hna i pyi-htay-yi vuanci nih hi inn sakpiak dingin a ka lehmi a si. Mah pin ah an ka pek rih lo mi palek nupi ngei lo mi hna umnak inn (lu-pio-sawng) minung 30 tlum pe 90 x 22 sing 77 dih ding ca zong ka rak hal chih” tiah MP Pu Bawi Khingnih TCP ah a chim.

Atu lio Thantlang pelek quarter’s inn ah a ummi chungkhar dawng 14 tluk an si i Quarter’s ah aa tlum lo i khuachungah inn a hlangmi zong an um len. Atu lio an umnak inn ah khua dang in a rak i thialka mi nih an umnak ding inn cu anmah thazaang tein an i remh hma sa hnu ah an um tawn. Furpi ko ah hin an har khun i ruah nih a zuh len hna pin ah a vam le a tuang zong muka (plastic) belh chom in an um tiah theih a si.

Na ruahning rak langhter ve.. (Leave a comment)

%d bloggers like this: