Thantlang Peng Aibur Khua Hydro-Electric Tuahmi Cozah Bawmhnak An Herh

0

Aibur Mei tuahnak/ TCP

TCP Hakha| 2020 January 3|  Thantlang Peng Aibur khua cu khua electric mei vannak (200KW) caah Leitak le Aibur ramri karlak a ummi Sawhrawva mei sing 3700 deng dih in ramchung ramleng bawmhnak in an tuah cuahmah i Cozah lei bawmchannak an herh ngai ko tiah khuami sin in thawng kan theih.

“Aibur Electric (15KV) hi Aibur va ah ramleng fanau bawmhnak in 2008 ah Sing 100 leng dih in kan rak tuah cang. Tihnah laknak le sehlei a tlam a tlin tilo caah 200KW chuah kho dingin Ramleng Aibur fanau thazang in Sing 3700 leng dih dingin kan izuam cuahmah lio a si. Sing 1500 hi Pipe cawknak le ti-inn tuahnak ah kan dih cang. Turbine, Dynamo, Transformer, Mei hri tbk cawknak ah sing 2200 fai kan herh rih. Ramleng um fanau le ramchung thazang lei in tulio kan Cozah bochan in kan izuam cuahmah lio a si. Atangmi tlawmpal hi kan Cozah nih an kan bawmh khawh ahcun kan duh ngaingai ko. Cozah Natala le mei lei zung zongah bawmh kan hal cuahmah hna tutiang cu zeihmanh an kan leh rihlo” tiah Aibur Khuabawi Pu Duh Hmung nih The Chinland Post ah a chim.

“2020 Chin National Day Thantlang tuahmi ah Vice President Dr. Henry Van Thio asilo ah a nupi sin zongah thil sining le bawmhhalnak tuah kan duh ko. Cozah lei nih an kan bawmh ve lo ahcun kan har ngaingai cang” tiah a biapeh ah a chim.

“Aibur hi Zophei peng ahcun Khua nganbik lei ah kan cang. Tu bantuk mei kan tuah duh hnawh chanbik pakhatnak cu fale fimcawnnak caah a si. Pahnihnak ah  pawngkam le thingram zohkhenh in electric in rawlchumh khawhnak, aa thialkammi lo thawh sitilo in kan khuataw ah cinthlaknak in pawcawmnak thlennak le alamkip in thanchonak tuah hna usih timi ruahchannak he kan tuahmi a si “tiah mei committee upa Pu Ceu Vung nih The Chinland Post ah a chim.

Aibur khua cu Thantlang peng Thantlang in khan 35 aa hlatnak ah a ummi inn 200, minung in 1200 tluk a ummi khua a si.  Aibur Ramleng a ummi US, Canada, Australia, Europe le Japan ummi hna thazang in Aibur in khan 2 fai aa hlatnak Sawhrawva Hydro-electric laknak an tuahmah hi a si. +++

 

About The Author

Na ruahning rak langhter ve.. (Leave a comment)

%d bloggers like this: