Thantlang Peng CNLD Pyine Hluttaw No. 1 in Chin Chin Pekthang Aa Cuh Lai
Chinchin pekthang/Fb
TCP- Online– Aralaimi 2020 thimnak ah Thantlang peng CNLD aiawh in Pyine Hluttaw No. 1 ah Chin Chin Pekthang aa cuh lai tiah thawng kan theih.
Thantlang khuanu khuapa cheukhat le upa hna nih Chin Chin Pekthang cu CNLD in buaibai a chuahnak Pyine Hluttaw No. 1 cuhding in an fial hi a si tiah kan theih.
Chin Chin Pekthang nih amah pumpak Facebook ah,
“Thantlang khuanu khuapa in upa cheukhat le hawikom rual nih Thantlang Peng in Candidate luh ding an ka fial caah tampi kai lawm. Ka phutawk lo in atu bantuk in sawm ka ton caah kai lawm khun. Kei zong ramkhel lei ah ka si khawh tawk in ai pe zungzal mi le miphun caah ka tuan khawhnak lam in tuan ka duh peng rih caah nan ka fialnak paoh ah hmanrua si kai zuam lai. Pathian nih caanrem a ti i a hnatlaknak a si ahcun kei zong thlacamnak he timhlamhnak ka ngei lai. Thlacam nak in rak ka bawm ve uh law. Nan dihlak cung ah tampi kai lawm.”
tiah aa tar.
Thantlang CNLD in Chairman Pu Lal Maung Cung le Secretary Pu Tum Sang cu CEC nih nawl nan buar an ti caah July 11, 2020 ah an phuah hna.
Chin Chin Pekthang cu Thantlang peng Van Zang khuami Pu Pekthang fanu a si. Atu lio a riantuannak cu: Tlangcung mi party 22 fonh a simi Nationalities Brotherhood Federation (NBF) ah Director a tuan liomi a si i cu pinah a tu lio UPDJC-Union Peace Dialogue Joint Committee le Union Peace Conference 21st Palanong ah tlamtlingtertu pakhat (Facilitator) in a tuan liomi a si.+++
