Thantlang Peng CNLD Pyithu Hluttaw in Salai Van Bawi Lian aa cuh lai

MP aa cuhding Salai Van Bawi Lian

| Hakha – The Chinland Post| Salai Van Bawi Lian (Martin) nih aralaimi 2020 i ramkomh Kawlram thimnak ah Thantlang peng aiawh in Pyithu Hluttaw hmunhma (Constituency) ah kaa cuh lai tiah June 15 ah amah pumpak Facebook Page in thawngthanhnak a tuah.

Thawngthanhnak a tuahmi ah Salai Van Bawi Lian nih, “Chin National League for Democracy (CNLD) ah chungtel tling ka si bantuk in le atulio Hakha peng aiawh in chimnaknawl ngeitu (Spokesperson) le mino hruaitu (youth leader) a tuan liomi ka si bantuk in Chin National League for Democracy (CNLD) Party in MP kaa cuh lai” tiah CNLD Party aa thimnak kong a langhter.

Cun MP cuhnak hmunhma (Constituency) kong ah Pyithu Hluttaw in cuh a duhnak kong a langhter chih.

“Keimah pumpak ‘nihin ramkhel ka cuanhnak’ cung ah ramkhel lei hmuhtonnak a ngeitu nu le pa, fimthiam hna le hawi le kom he biaruahnak ka ngeih hnu ah Thantlang Peng Pyithu Hluttaw hmunhma (Constituency) in MP i cuhding ah biachahnak ka tuah,” tiah a thanh.

Thantlang peng aiawh in CNLD ah aa cuhding minung pali an chuak cang. Cu hna cu Salai Ceu Bik Thawng, Salai Van Bawi Lian, Pu Lal Maung Cung le Pu Rung Kaw an si tiah kan theih.

Salai Ceu Bik Thawng le Pu Lal Maung Cung bel hmuhhma (Constituency) an sawknak aa khah caah Thantlang EC nih thimfung a thlak hnu ah teinak a hmumi paoh Ticket an pek hna lai tiah kan theih.

Hi kong he pehtlai in Salai Van Bawi Lian nih, “Party EC nih phung an ngeihmi in an kan thim te lai. Pyithu Hluttaw ah keimah lawng si lo in a dang a apmi zong an um tiah ka theih. EC nih thleidan lo in aa ruangte in an kan zohpiak te ko lai. Fiang in ka thei rih lo nain July thla thok ah an kan auh lai i, TICKET pekding thimnak an kan ngeih te lai ka zumh,” tiah The Chinland Post ah a chim.

Salai Van Bawi Lian (Martin) hi CNLD nih Ticket an pek ahcun Thantlang Peng NLD aiawh in Pu C Za Cung le USDP aiawh in Pu Zo Peng he an i zuam te lai tiah kan theih.

Thantlang peng NLD aa cuhding cazin zong a chuak cang i No 1. Pyine Hluttaw in Pu Chan Ham le No. 2 in Pi Ni Sui Lian, Amyotha Hluttaw in Pu Henry Van Thio le Pyithu in Pu C a Cung an si hna.

USDP in nihin tiang cu aa cuhding ah Dr. Hmuh Thang le Pu Zo Peng lawng an i fiang tiah kan theih.

Salai Van Bawi Lian (Martin) hi Thantlang peng Aibur khuami, kum 37 mino a si pin ah hmuh tonnak tampi a ngeimi a si tiah kan theih. Thailand ram ummi Chulalongkorn University ah Political Science tang in MA a dih mi a si i, atu lio hi World Bank i Kalay – Hakha lam remh ding ah thiamsang dirhmun in le Field Supervisor in a tuan liomi a si tiah kan theih.

Na ruahning rak langhter ve.. (Leave a comment)

%d bloggers like this: