Thantlang Peng Cozah Sianginn Laica Chim Minung 300 Renglo Nihnih Chung Training An Pek Hna
Salai Elvis| 2018 Tho 4| CACC (Chin Association for Christian Communication) le Thantlang Chin (Hakha) caholh le nunphung Committee i bawm in Thantlang peng cozah sianginn ah Laica chimtu saya/mah minung 347 cu October 2-3 tiang TBC Hall le TABC Centre ah nihnih chung training an pek hna tiah theih a si.
Hi cawnpiaknak cu CACC in Pastor Lai Cung le Pu Ram Mang nih nihnih chung an cawnpiak hna. Abik in taangcheu, taangkhat le taanghnih tiang Laica, Lai holh umtuning pawl chimhcawnpiak an si.
“Tutan training pekmi minung 347 cu caantling riantuan dingin cozah lei ah kan chimpiak ding kan i tim ko nain an zapi in cun rian an pek dih hna lai ka zum lo. Kanmah lei nih cun taanghnih tang sianginn ah siangngakchia 20 an um ah cun Laica chim saya/mah pahnih chiahpiak dingin kan sokpiak hna lai” tiah cawnpiaktu Pastor Lai Cung nih TCP ah a chim.
Atu bantuk in CACC nih Sianginn kip ah Laica chimtu saya/mah an chambau lo nakhnga Hakha le Thantlang peng chung lawng si lo in Gangaw le Kalay- Ka-baw tiangin biatak tein saya/mah sin ah training an pek cang hna. Hakha peng zong October 5-6 tiang training pek an si ve lai tiah theih a si.
Thantlang peng cozah sianginn kip ah Laica chimtu saya/mah hna cu 2017 December thla in rian pek an si. Atu lio Thantlang peng chungah cozah sianginn 116 a um i cozah nih phungning in rian a pekmi hna Laica chim saya/mah 46 lawng an um tiah kan theih. ++++
About The Author
