Thantlang Peng Farrawn Khuate Ngandamnak Sii-inn Cu Taih-ne Sii-inn Ah Sanhpiak A Si Rih Lai Lo

Salai Elvis| 2019 February 1| January 31 ni ah tuahmi Amyotha Hluttaw meeting avoi(11)nak, caanhman tonpumhnak ah MP Pu Bawi Khing nih Thantlang peng Farrawn khuate ngandamnak sii-inn cu Taih-ne sii-inn ah sanhpiak dingin timhtuahnak nan ngei maw ngei lo tiah biahalnak a tuah.

Amyotha Hluttaw palai Pu Bawi Khing nih “Farrawn khua cu India ramri ah ummi a si. Minung 860 leng, siangsangruunthen (thah-khuai) le siang niamruun sianginn an um nak khua a si. 1956 kum December 18 ni khuate ngandamnak sii-inn cu rak pek cang mi a si i Chin ram chungah a kum sau pawl a si cang. Hi khua cu Vanzang tlang khua lai bik ah a ummi khua a sinak, India ramri a si caah khualtlawng an tamnak hmunhma a sinak le mizaw hna caah Thantlang, Hakha lei an rat tikah harnak an ton nak, Taih-ne sii-inn ah nan chap ah cun vawlei hmunhma zong chiah cia a sinak, a kingkap khuate minung 5947 le siangngakchia minung 1500 renglo ca zongah ngandamnak lei ah tampi thathnemnak a chuahpi lai pin ah Thantlang peng ngandamnak lei zong nih Taih-ne sii-inn ah sanhpiak dingin mah khua hi aa tlak bik a si an ti nak kong” biahalnak a tuah mi cu a tanglei bantuk in bialehnak an tuah.

Thantlang peng hi Taih-ne sii-inn 4 le ihkhun 50 tlum sii-inn pakhat tiin sii-inn 5 a umnak peng a si. Farrawn khua cu Thantlang in khan (meng) 25 aa hlannak a si i zeitik caan paoh motor/cycle in kal peng khawh a si ko. Farrawn ngandamnak sii-inn tangdeuh ah ngandamnak sii-inn then 4 a um rih. Cucaah minung sining le inn chungkhar sining zohtik ah Taih-ne sii-inn ah sanhpiak dingin aa tlak rih lo. Chinram cu thanchonak lei zongah a hnubik a si caah rampi ngandamnak zung le ramkulh ngandamnak i bawm in Committee ser hnu ah ngandamnak lei ah zeidah an chambau timi hlathlainak tuah hnu ah riantuan kan i tim ko. Cucaah Hluttaw palai nih na kan hal lo mi zong tampi aa tel te ko lai. 2019-2020 kum dih hlan ah tuah kan i tim ko. Chin ram chung lawng si lo, kadang ramthen zong an i tel dih lai” tiah Dr. Myint Htwe nih bia lehnak a tuah.

Na ruahning rak langhter ve.. (Leave a comment)

%d bloggers like this: