Thantlang Peng I Rak Tlaihmi Kum 5 Thongtla Ding Bengali Nu Pahnih Cu Thongtla Luatdaihnak Pekmi Ah An I Tel Ve
Salai Elvis| 2018 April 21| Kawlram President nawlpek nakin April 17 ah thongtla minung 8490 luatdaihnak pekmi hna chung ah Thantlang peng CNA Camp in rak kuatmi Bengali nu pahnih cu Kalay thonginn chungin luatdaihnak an hmu ve. Cu ruang ah April 20 ni ah an umnak Mizoram lei ah an kuat cang hna tiah thawng ka theih.
2018 April 20 zanlei sumilam 3 :45 ah Falam peng Rihkhawdar lei in cozah rianngeitu hna nih an umnak ram lei ah a tu bantuk in an kuat hna hi a si.
Hi hna pahnih cu kum 18 le 19 minung an si i Kalay thonginn in Hakha lah-wah-kah lutlai chang Pu Tum Thang le a hawile nih Rihkhawdar lei ah an rak thlah hna i a tu bantuk in tuanvo ngeitu penguk bawi, palek, lah-wah-kah, sangchung khuabawi hna le Zokhawthar Mizoram lei in tuanvo ngeitu khuabawi hna sin ah pekchanhnak le i kuatnak an ngeih hna.
“President U Win Myint nawlpek in thongtla a luatmi ah aa tel vemi Bengali nu pahnih hi Kalay thonginn ah kum 5 tla ding in biakhiahpiak an si cang. Asinain thong kum 5 tla ding an si ko nain thlahnih tluk lawng an tlak caah an va a tha tuk” tiah Hakha peng lah-wah-kah pakhat nih The Chinland Post ah a chim.
CNA ralkap nih Bengali minung pali cu February 6, Tio hlei an tan lio ah an tlaih hna. CNA ralkap nih February 13, suimilam 2:00 ah Thantlang penguk palek zung ah an rak ap hna. Penguk zung nih palek sakhaan ah an kan ap than. Dengteo in ahmuh tuah awk a that lo caah lah-wah-kah ah an ap than hna. Lah-wah-kah nih ramkulh sin ah atu hi zeitindah an tuah lai timi nawl an hal hna hnu ah atu bantuk in Kalay thonginn ah an kuatnak hna hi a si. Bengali minung pali an tlaihmi hna lakah pa pahnih cu Rakhine ramthen, Maungtaw peng in thil zuar le Nu pahnih cu Mizoram Aizawl in sin um veve an si. Hi hna pali cu kum 18 le 19 minung an si tiah Thantlang palek zung cazin ning in theih a si.
Hi lio ah pa pahnih (Mawngtaw peng) le nu pa hnih (Aizawl ah sin um rian a tuan mi) rak tlaih an si i pa pahnih cu an luat le luat lo theih a si rih lo.
Ref: IPRD Rihkhawdar/ TCP Newspaper Feb,22, 2018
Hika link ahhin CNA nih an rak tlaih hna nak, Thantlang penguk zung nih Kalay thonginn ah an rak kuatnak hna kong thawngpang relchap khawh a si.
CNA Ralkap Nih Tlaihmi Bengali 4 Cu Kum 5 Chung Thongthlak Ding In Kalay Ah An Kuat Hna
About The Author
