Thantlang Peng Khua 20 Khuakhat Ah Sing 100 Cio An Bawmh Than Hna Lai
Salai Elvis| 2018 November 13| Khuate thanchonak zung nih tlaihmi Village Development Program (VDP) in 2017 kum ah Thantlang peng khua 35 cu khuakhat sing 100 cio bawmhnak pek hnu in avoi hnihnak khuakhat sing 100 cio in khua 20 bawmhnak an pek rih hna lai tiah theih a si.
Tutan 2018-2019 kum ah khua 20 bawmhnak pek dingmi hna cu khua thanchonak tawlreltu hna, Hluttaw palai le khuate thanchonak zung hna nih cu khua bawmh ding timi an thim hnu ah a tu bantuk in avoi hnihnak 20 an thim hi a si.
Khua 20 an thimmi hna cu: Sialam, Hmunhalh, Banawhtlang, Sihhmuh, Kuhchah, Thinghual, Ngaphaite, Leitak (Zipi), Lawngtlang (A), Saikah, Khuahrang, Sopum, Tlangpi, Tihbual, Hmunlipi, Aibur, Lungding, Zaangtlang (B), Belhar le Ngaphaipi an si. Mah khual pawl hi khua khat sing 100 cio bawmhnak pek than an si lai.
“Hi bawmhnak cu khua khat ah inn 20 a tling lo mi cu kan thim hna lo. Rian an tuan ding pawl cu khuami nih anmah duhmi an i thim te lai. Tangka zong tukum December asiloah 2019 January ah pek colh khawh an si lai ka zumh” tiah Thantlang peng khuate thanchonak zung riantuan pakhat nih TCP ah a chim.
Atu bantuk in avoi khatnak khua 35 zong khua khat sing 100 cio rak pekmi chungah a bik in ti khonnak, Hall saknak, Siangcachim saya te umnak inn le Library inn saknak deuh ah khuate lei bawmhmi hna nih an hman tiah theih a si.
Thantlang peng ah khua 85 an um i khua 55 bawmhnak pek an si hnu in khua 30 bawmh rih lo mi khua an tang rih tiah theih a si. +++
About The Author
