Thantlang Peng Khuate Kip Electric Mei Hmuhnak Kong MP Pi Ni Sui Lian Nih Hluttaw ah Biahalnak A Tuah
Salai Bawi Lian Sang@KMT| TCP-Kalay| September 3, 2020| A chanhnihnak Pyithu hluttaw (17)tlinnak meeting ni (11) ah Thantlang in MP Pi Ni Sui Lian nih Thantlang peng caah (66)Electric mei tuah lio mi le pengchung khuate kip ah Electric mei pekding in timhlamhnak a um maw tiah bia halnak a ngei.
Mah biahalnak he pehtlai in Electric Minister changtu U Khin Maung Win nih Thantlang khua chungah KV66/11KV(5)NVA thilri le Control zung inn thilri cu 2019-20 kum budget ah lim ding in tuan lio a si. Hakha in Thantlang ah (66) KV Electric meihri zamnak 145 mile tuanding zong 2020-21 kum ah lim ding in tuan cuahmah lio a si i mah a dih in Tlangkhua Ohsuh le Tlangte Ohsuh chung um khuate (4) tiang Electric mei an hmuh kho lai. Thantlang mei zung um 66/33 KV(30) NVA Transformer he a pehtlaimi cu 2021-22 kum Pyithaungsuh budget in sak ding ah timhlamhnak a um.
Thantlang peng in Hnaring peng tiang (33) KV mei hri 38 mile a sau mi Hnaring peng ah 33/11 KV(5)NVA Electric zunginn saknak ah 2020-21 budget kum le 2022-23 budget kum ah Pyithaungsuh budget chungin sak a si lai. Mah Electric mei zung inn Hnaring peng Khuahrang, Thangaw, Fangthen, Surngen, Sati Ohsuh le khuate (10) mei a hmu dih lai. Congthia in Hriang Khan tiang 33KV Electric hri line 2 in 33/11 KV(5) NVA zunginn 2 sak ding ah Pyithaungsuh budget in 2023-24 budget kum ah tuahpiak ding in timhlamh a si i mah sak dih ah cun Congthia, Hriphi, Hmongtlang, Buanlung le Dongva Ohsuh in khuate(13) hna le Hriangkhan, Thau, Bungtlang, Salem, Tikir, Sialam Ohsuh in khuate (12) tiang mei a pek khawh dih lai.
Vuangtu le pawngkam khua Belhar, Lulpilung, Zephai Ohsuh um khuate (14) tiang mei pek a si lai i, Congthia in Vuangtu tiang 33KV Electric tha pek kho mi zunginn sak le, 2024-25 Budget kum Pyithaungsuh budget in suaipiak cia a si.
Ngaiphaite, Lailenpi, Ngaiphaipi Ohsuh in khua (11) tiang meihri zam piak nak cu Hnaring in Ngaphaite tiang 33KV Electric mei zung inn sak ding, 2025-26 budget kum Pyithaungsuh budget in sak an timhnak kong, Farrawn khua le pawngkam um Lungding, Tikhuangtum, Tlangkhua, Tlangpi le Vanzang ohsuh in khuate (11) tiang electric mei pek ding in Thantlang peng Farrawn ah 33 KV Electric mei zung inn sak ding le 2016-17 Pyithaungsuh Budget ah hal in sak ding le Lungler le pawngkam um Thangzang, Dawn, Zangtang, Saikah Ohsuh in khua (11) tiang Electric mei pek kho ding in Thantlang in Lungler tiang 33KV mei tha peknak zunginn sak ding le 2027-28 Pyithaungsuh budget in timhlamhnak a um.
Cucaah Thantlang peng chung um khua vialte cu Rampi Electric mei pe kho ding ah 66KV le 33 KV meitha Zung inn cu Pyithaungsuh Budget in sak ding ah timhlamhnak a um ko i Chinram Budget chung in 11KV meitha le Transformer cu zohchunh in sak ding ah timhlawmhnak a um ko tiah a chim.
