Thantlang Peng Laica Chim Saya/ma Te An Chanbau Rih
Salai Elvis| 2018 July 16| Tlangcung mi holh, ca cawn le kilvennak lei zung hna tawlrel nak in cozah sianginn ah Laica chimtu saya/ma hna zong rian pek an si, hi chungah Thantlang peng chungah Laica chim saya/ma te an chan bau rih tiah theih a si.
Thantlang peng Laica chimtu rian cu 2017 October 10-14 tiang rian auhnak rak tuah a si. Mah lio ah tangriat awng nih sok khawh a si caah minung 283 nih rian cu an sok hna nain cozah nih Thantlang peng caah Laica chim saya/ma 47 lawng rian a pek hna caah khua dang cheu khat hna ah Laica chim saya/ma a ngei lo mi hna zong an um tiah theih a si.
“Laica chim saya/ma te an i tingzo maw titikah an i tingzo lo. Hi kong hi fimcawnnak zungpi he kan i pehtlai tuk lo, Direct in cunglei nih rian an pek hna i kan mah lei cu a tawlrel tu sawhsawh men lawng kan si. Rian an pek mi hna tak cu tangkau awng in a cunglei poah an si, cun kum 19-30 kar tibantuk ri khiah mi an ngei. Kan mah nawl in saya/ma te chap le tlennak nawl kan ngei lo. A tu lio Thantlang peng chungah Laica chim saya/ma te 47 rian pek an si nain minung pakhat cu sianginn kai duh ruangah rian a chuah tak caah minung 46 lawng an tang. Sianginn pakhat ah Laica chim saya/ma te hi an i ruanglo. Sianginn pakhat ah saya/ma pathum le pahnih a um mi zong an um ko. Cun sianginn pakhat ah Laica chimtu a ngei bak lo mi zong an um ve thiam” tiah Thantlang peng fimcawnnak zung lutlai nih TCP ah a chim.
Thantlang peng Laica chim saya/ma te chanbaunak kong he pehtlai in June 27 ni ah CACC zung tuanvo ngeitu hna le Thantlang peng fimcawnnak zung hna hmailei karhlang ti dingin tonnak an rak ngei bal.
“Laica chim tu saya/ma hna Hakha le Thantlang peng chungin cazin kan lak hna lai i zeitluk dah cachim tu an i duh rih timi kan zohfel hnu hna ah biatak tein Chin ramkulh cozah sin ah chim phuan kan i tim” tiah CACC caholh le nunphung kong tuanvo ngeitu Rev. Paw Luh nih TCP ah a chim.
Thantlang peng sianginn kip ah Laica chim tu hna cu 2017 December thla in rian pek an si i ni ca in thlahlawh an pek hna. Mah lio ah nikhat 5000 an hmuh i 2018 April thla in cozah rian tuan thla hlawh a kai hnu in an mah zong a kai ve lai tiah theih a si.
Atu lio 2018 kum Thantlang pengah cozah sianginn 116 a um i siang cachim zapi saya/ma 853, siangngakchia 1324 an um i Laica chim saya/ma 46 an um tiah theih a si.+++
About The Author
