Thantlang Peng Nu Naupawi Kumkhat Chungah Minung 1925 Tluk Bawmh An Si Cang
Salai Elvis| 2018 July 3| 2017 June thla in 2018 June thla tiang ah Thantlang peng nu naupawi minung 1925 tluk bawmhnak pekmi an si cang tiah tuanvo ngeitu sin in theih a si.
Hi bawmhnak pekmi cu thla khat ah 15,000 in pek an si i thla hnih dan ah tangka chuahpiak an si. Kum khat chungah a tangka in sing 1,000 leng bawmhnak pek an si cang tiah tawlrel tu Chan Nawl Mang nih a chim.
“Nu naupawi cu thla khat hnu thla khat an i chap lengmang. Buaktlak in thla khat ah minung 50 in 100 kar le May thla chung ah khan an tam khun i naupawi lawng 150, ngakchia chuak hi 128 an i chap ve. Nau an pawi thla in khuabai sin ah cazin pek i nau an pawi chung kha cu an nu le nih ei-din an ei i ngakchia an chuah in ngakchia hna nih an ei ve cang. An fa le kum hnih an si tiang thla khat ah 15,000 pek an si lai” tiah Chan Nawl Mang nih TCP ah a chim.
Nu naupawi tangka bawmhnak pekmi kong he pehtlai in, nu le hna sin ah a hman ningcang, a sawhsawh in hman lo ding le ngakchia caah Vitamin a tha mi eipiak ding tibantuk cawnpiaknak tete zong an tuah hna. Hi bawmhnak cu Life Fund nih tangka pekmi a si. A tu bantuk in kum 90 cung tar bawmhnak zong thla khat ah 10,000 cio thla hnih dan ah pek peng ve an si. Hi bawmhnak cu Life fund nih kumhnih tiang lawng a pek hna lai tiah theih a si.
