Thantlang Peng Palek Zungah Ahmuh 90 A Ummi Chungah Motorcycle Tlaihmi A Tambik

Salai Elvis| 2018 November 15| 2018 January in November 13 tiang ah Thantlang peng chungin palek zungah ah ahmuh (case) tuahmi 90 chungah motorcycle tlaihmi case a tambik tiah theih a si.

Tukum thla 11 (November 13 tiang) chungah Thantlang peng in palek zungah ah ahmuh (case) a phanh ning cu; motorcycle phungninglo aa citmi le dandatmi 78, motor/cycle khawndennak voi 7, mithah lainawnnak voi 1 le a dangdang ahmuh 4 an si. A zapi ahmuh 90 a si tiin November 14 Thantlang palek zung cazin ning in kan theih.

Motorcycle tlaihmi hna cu motor PK upadi (62) in tazacuai mi deuh an tam i motorcycle pakhat ah Ks.30,000 in dandat mi deuh an si hna. Mithah lawinawnnak ahmuh (case) pakhat tu cu upadi 302 ningin bia an ceih lio a si tiah kan theih.

Thantlang khuachungah cycle le motor khawndennak a zor deuh nakhnga lam zulhphung le a bik in cycle/motor a khalmi hna sin ah ralrin peknak le cawnpiaknak zong sianginn le zalampi ah motor PK le tuanvo ngeitu hna nih rak tuah lengmang cang mi a si.

A bik in 2018 June ni 4 thok in zulhphung zul duh lomi hna cu fakpi in dantatnak an tuah hna hi a si. Atu lio Thantlang khuachung ah motor PK nih an zohfel bik mi hna cu; minung pathum aa phirh mi, luchin chinh lo, Driving License, License Number a benh lo mi le hnulei zohnak thlalang a benh lo mi pawl deuh an tlaih hna tiah kan theih. +++