Thantlang Peng Tanghra Sianginn 5 Nih Tanghra Siangngakchia Pakhat Hmanh An Ngei Lo

0

Salai Elvis| 2018 March 8| 2017-18 cacawn kum ah Thantlang peng chung tanghra sianginn 14 lakah sianginn 5 cu tanghra siangngakchia pakhat hmanh an ngei hna lo tiah kan theih.

2017-18 cacawn kum ah Thantlang peng chung ah tanghra sianginn 14 a um. Hi chung ah sianginn 5 ahcun tanghra siangngakchia pakhat hmanh an um lo. Tanghra sianginn a ngei i siangngakchia a ngei lomi khua hna cu; Hriphi, Zephai, Tlangkhua, Tikir le Lungler khua an si.

March 8 chun Thantlang tanghra camipuai a phimi luhchuah lio

Thantlang peng ah tukum tanghra a phimi hna khua cu; Thantlang khuapi chung BEHS No.1 in minung 77 le No.2 in minung 43, Hnaring ah 28, Ngaphaipi ah 12, Hmawngtlang ah 4, Farrawn ah 11, Tlangpi ah 7, Hriangkhan ah 9 le Aibur ah 1 hi tukum Thantlang peng in tanghra camipuai a phimi an si.

“Hiti tanghra siangngakchia an ngeih lonak a ruang bik hi cacawnnak sianginn (building) a that lo pin ah siangcachimtu an fel lo. Cu tikahcun nu le pa nih khua ah tanghra cawnter duh lo in khuapi deuh i an kaiter hna ruang ah a si. Cun kapkhat lei cun khua sining le milu he aa tlak lo in tanghra sianginn hal thlawrh in kan hal ruang zong ah a si. A cheukhat khua cu tanghra sianginn siseh, sianglairun siseh pek awk tlak lo in pekmi sianginn an tam” tiah Hakha peng ah siangcachim riantuantu pakhat nih The Chinland Post ah a chim.

2018 March 7 le 8 ni hnih chungah Thantlang peng chung in tanghra camipuai a philo mi siangngakchia 66, nu 38 le pa 28 an si. Camipuai a phimi siangngakchia zapi hi 299 an si.

“A ni khatnak ah minung 66 a phi lo mi an si i ni hnihnak zong amah ningte an si ko, a phi lomi dang an um ti lo. Ni hnih chung an phitmi ah kan siangngakchia cheukhat cathiam deuh nih kan phi kho lo an ti i cathiam lo deuh kan ti hna lai cu mah pawl nih cun kan phit khawh ko an kan ti i zeidik an lawh te hnga” tiah Saya Lian Aung nih The Chinland Post ah a chim.

Thantlang peng tanghra camipuai phi dingin khung number (role no) a chuakmi cu minung 365 an si i minung 299 lawng an phi i minung 66 cu an phi lo tiah theih a si.

2016-2017 kum lio zong ah camipuai a phiding minung 345 chungah minung 280 lawng an rak phi. Minung 65 camipuai phi lo in an rak um tiah theih a si.

Tukum tanghra camipuai Hakha khuapi chung in a phi lomi siangngakchia zapi hi 219 an si i a phimi zapi hi 1806 an si.

March 7 ah thawkmi Myanmar rampi tanghra camipuai a phi dingmi zapi hi 844,358 an si i a nikhatnak camipuai a phimi zapi hi 788,863 lawng an si. Myanmar rampi huap in camipuai phit lo in a baumi zapi hi 55,495 an si. Hi chung ah camipuai phi ding a si ko nain a nikhatnak Myanmar major phit ni ah zatuak (%) in a bau bikmi ramkulh cu Chin ramkulh a si. Chin ramkulh in minung 11741 a phi dingmi chung ah 10167 lawng an phi, siangngakchia 1574 an phi lo. Chin ramkulh in siangngakchia a phi lomi zatuak hi 86.59% in an tlawm bik. A chang tu ah Rakhine ramkulh an si, 87.78% lawng nih camipuai an phit i a phi lomi hi 5453 an si.

About The Author

Na ruahning rak langhter ve.. (Leave a comment)

%d bloggers like this: