Thantlang Peng TB Zawtnak Lunghrinhmi Pyi Gyi Khin Foundation Nih Sii-inn Ah Mi 500 A Hmuhsakter Cang

Salai Elvis| 2018 April 4| 2017 August thla in 2018 March thla tiang ah Thantlang peng chung in TB zawtnak a ngei kho tiah lunghrinhmi minung 500 renglo Pyi Gyi Khin Foundation nih sii-inn ah chekhlatnak le hmuhsakternak a tuahter cang hna tiah kan theih.

“Kannih project hi TB zawtnak a ngei sual hnga maw timi ahlankan in ralrinnak le i thlopbul chungnak kong a tawlreltu kan si. Thantlang peng khua 50 ahhin khuakhat minung pakhat cio zaanghleicawi (Volunteer) in kan chiah hna. Anmah nih minung an kawl i Thantlang lei ah an ratter hna hnu ah ca kan pek hna i sii-inn ah kan hmuhsakter than hna. TB zawtnak an ngeih le ngeih lo sii-innlei nih an thi, an pum rihzan, dat-hman tiangin an thlak hna i TB a ngeimi cu alak in sii an pek hna. Khuate lei hmuhsak ah a rami an si ahcun kanmah lei nih an tlunkalnak man kan liampiak chih hna. Kan riantuannak kumkhat a tling deuh lo nain hi chungah sii-inn ah TB zawtnak an ngeih le ngeih lo kan hmuhsaktermi hna hi minung 500 renglo an si cang” tiah Township Manager Cungpi nih The Chinland Post ah a chim.

TB zawtnak aa thok ning cu a tlawm bik zarhhnih a khuh lai, a taksa pah lai, zan ih kar ah a thlan chuak mi (ngakchia), a chak ah thi aa tel mi, Ngakchia an si ahcun an pum rihzan (Pound) a kai kho ti lo i a thang lo mi, upa an si ah cun an pum rihzan (pound) a kai lo hmanh ah an der i rawl an duh lai lo. An hngawng le an zak tang ah a bomi a um lai” tiah TB zawtnak ah dengteo piin thih timi cu a um tuk lo. International level in minung 100 ah sii-inn ah hmuhsakter mi chungah minung 10 hi TB zawtnak a ngeimi taktak an si. Sii tha tein din ko ahcun TB cu a tlau kho ko” tiah Cungpi nih a chimchih.

Pyi Gyi Khin Foundation cu Chin ramchung Falam, Hakha le Thantlang ah zung hun a si i 2017 August thla in Thantlang peng khua 50 ah TB zawtnak lei riantuan hram an thok tiah theih a si.

Na ruahning rak langhter ve.. (Leave a comment)

%d bloggers like this: