Thantlang Penguk Bawi Hruainak In Lam Mei Hmun 100 Tluk A Ceu Cang
Salai Elvis| 2019 July 2| Thantlang khuachung Bogyoke lam pi a ceu nak ding caah penguk bawi U Aung Shwe Myint hruainak in lam mei hmun 100 tluk ah a ceu cang i a taang mi zong pehzulh in an tuanhchuah rih lai tiah kan theih.
Hi mei ceu khawhnak ding caah khuachung um Company, Cozah zung, Biaknak lei cheukhat hna sin le pumpak sin in bawmh hal hnu ah a tubantuk in rian an tuan hi a si. Lam mei vannak caah SME Development Bank zong nih sing 5 a hlut ve hna. A tubantuk in khua chunglam cu Hakha lei khualuh hauka (Cusu-bar-ih) in sianginn sangthen cheukhat tiang van a si cang.
“Thil tha a kan tuahpiak tu penguk bawi le kut a samhtu cungah kan i lawm taktak. Suimilam 24 chung mei kan hmu kan ti ko nain lam mei a ceu lo ah cun a mui mi kan lo peng a tu cu zan zongah a ceu dih cang caah chawhvah zong a nuam i khuachung zong a dawh ter ngai cang” tiah sangthen khuabawi pakhat nih TCP ah a chim.
Hi mei cu pakhat ah 150,000 a si i LED, 84W IP65 phun a si. Hi mei vannak rian cu May 29 in meizung nih bunh hram an thok tiah kan theih.
About The Author
