Thantlang Sianginn Sang Nih Anmah Thazaang Tein Sianginn An Sak
Salai Elvis| 2018 April 24| Thantlang khuachung sangthen No.1 nih anmah thazaang tein siangniamruun sianginn then (mu-khuai) an sak liopi a si tiah thawng kan theih.
Hi sianginn cu Lungler lam pawng ah a si i ekah 3 tluk a kaumi hmun ah, tlangrian thawh in inn khat hnu inn khat sianginn sak ah an i thawh hna tiah theih a si.
“Sianginn sang hi inn a karh tuk cang caah atu BEHS No.1 va kai khi ngakchia caah an i harh tuk cang. Cucaah keimah khuabawi ka si lio te ah siangniamruun sianginn pakhat cu ka halpiak hna lai tiah saduh ka rak that. Hi sianginn saknak caah a kapkip in thazaang an ka pek ngai. Phungning tein a herhnak zung paoh ah ca ka chiah, ramkulh le penguk zung, Hluttaw palai hna sin tiang in ka chimh hna caah tukum, cacawn kum ah an ka pek colh lai ti zong ruahchannak ka ngei. Cucaah kan hmuh sual ah cun tiah ahlankan in kan sak chungnak a si. Hi inn saknak ah riantuanti hawi zong nih lungtho tein an ka bawmh caah kaa lunghmuih khun” tiah sangthen No.1 khuabawi Pu Van Tlir nih TCP ah a chim.
Hi inn saknak caah kanmah sianginn sang lawng nih sing 50 kan i suai chung i thutdan cabuai le ek-inn ca he cun tam ngai a dih ding kan si. Sianginn hi phungning in an kan pek ahcun cunglei zongah Budget kan hal than lai i cozah lei zong nih an kan zoh sawhsawh bal lai lo ti ruahchannak ka ngei. Hi sianginn ah hin hmailei ah cathiam tampi chuak te hna sehlaw, BEHS. No.3 tiang hmanh si kho te seh ti hi ka ruahmi le kaa tinhmi a si” tiah a chimchih.
Hi sianginn saknak caah nihlawh tangka pekmi minung 3 lawng an si i a dang cu sangchung tlangrian in aa thawhmi an si. Hi inn cu pe 50×21 in an sak liopi a si. Sianginn an saknak innhmun thar ah inn 90 tluk aa sa cang i minung dawng 56 an um cang tiah theih a si.+++
About The Author
