Thantlang Sii-inn Furpi I Ti An Har Caah Mizaw Harnak An Tong
Salai Elvis| 2018 July 24| Thantlang khuapi sii-inn cu furpi chung zong ah ti an i zawh lo caah mizaw pawl harnak an tong tiah theih a si.
Thal lio zongah a tubantuk in ti an har i ruahti a tam liopi fur chung zongah ti an har thiamthiam. Sii-inn um mi nau sem ngei ko caah a har tiah sii-inn um mizaw congtu pakhat nih a chim.
“Sii-inn kan umnak zarh hnih tluk a si cang. Ti cu zinglei ah fa tein a chuak ko nain thilsuk khim in a um lo. A leng ah nau puan kan su i ti kan i kholh. Ti a chuakmi hnih khat te cun ek-inn kal nak ah cun an hman ko nain cu zong cu a thur hnawm deuh caah kan chungkhat hna inn ah kan kal peng” tiah khuate lei in a rami nutung pakhat nih a chim.
“Zunput ti hman ding hmanh a um lo. Ninga chung a si cang. Nau ngeimi caah ko ah hin a har. Cun KBZ nih ti phurhnak motor zong pahnih a um ko nain sii-inn tuanvo ngeitu hna nih thawng an thnah hna lo le maw a si hnga” tiah mizaw umpitu patung pakhat nih TCP ah a chim.
“Sii-inn ti a dang tein lak ding zong cunglei ah kan hal lio hna a si. Cun ti kan har caan paoh ah sipin kan chimh hna i voihnih thum cu an kan ngalh cang. Datsi man tibantuk zong kan pek tawn hna. Nai hrawng cu an kan ngalh le ngalh lo ka hngal lo, ti kan ngei i si men lai” tiah Thantlang siibawi Dr. Van Van nih TCP ah a chim.
Hi kong he pehtlai in sangthen No.1 khuabawi Pu Van Tlir nih “sii-inn ti an hman mi hi hmun hnih chaklei phungki singinn le kanmah sianginn sang zong nih a dang tein kan pek fawn hna. Cuti kan i za lo ti lengmang cu an ti zohtu nih ti a chuak tak maw, aa rawhnak um maw timi a zohfel hau. Kam khat lei ah ti kongkau cu Siibawi te nih an hngal lai lo. Riantuantu dang nih an zohfel hau fawn. Hawi bantuk in ti kan pek caan aa khat ko sii-inn minung an tam pah tikah an i zat lonak zong a si kho ve. A tu rianrang in sipin kan chawnh colh hna lai, ti an har ah cun mizaw cong hna nih sii-inn tuanvo ngeitu an chimh hna i sii-inn riantuantu hna nih sipin kha an chimh ve hna ding a si” tiah TCP ah a chim. +++
About The Author
