Thantlang Siizung Ah Singapore In A Tlung Mi Nu Hospital Quarantine In An Chiah

TCP-Thantlang|2020 March 30| Singapore in a tlung i March 30 ni ah Kalaymyo in Thantlang lei ah a rak lan mi nu pakhat (kum 23) cu COVID-19 zawtnak ngiatthlai nak tuah in Thantlang siizung ah (Hospital Quarantine) in an chiah colh tiah theih a si.

Siizung ah an chiahmi nu (kum 23) he telh in motor aa cit timi minung 14 zong ni 14 chung leng chuak lo (Home Quaratine) in zohkhenh an si ve lai. Mah pin ah i runvennak caah Yangon, Mandalay, Kalay le ramleng in a tlung mi hna zong mah le inn cio ah ngaithlainak tuah cuahmah an sinak kong tuanvo ngeitu siin theih a si.

“Tuzan lei ah Singapore tlung, Kalay in Thantlang lei a rak tlung mi nu (kum 23) cu Hakha lei nih tha tein zohfel hnu ah COVID-19 zawtnak he aa pehtlai mi a pum chungah an hmu lo nain Thantlang ah cun sii zung ah ( Hospital Quarantine)in a dang teah chiah a si ko, a tulio zawtnak kong he pehtlai in zeihmanh a lang mi a ngeih lo caah thinphan awk zong a um lo. Ni 14 chung ngiatthlai a si lai. Cun a mah he Kalay in Thantlang kar motor ai cit ti mi hna zong an mah le inn cio ah (Home Quaratine)in felfai tein zohfelnak tuah an si lai.” tiah Thantlang siizung tuanvo ngeitu Dr. Van Lian Hum nih TCP ah a chim.

Siizung ah ngiatthlai mi nu cu siizung lei nih Breakfast (thawh hlam) an pek lai i Chuncaw le zanriah cu penguk zung nih an tawlrel lai tiah theih a si. Thantlang khua ah a tu lio zawtnak a um sual nak hnga lo runvennak tuah le a um a can sual ah tiin a hlankan timhtuahnak tha ngai zong an ngei hna. Atu lio ah Chin ramchung ah COVID-19 he pehtlai in ngiatthlai mi, minung 500 renglo an um tiah theih a si i Kawlram chung ah zawtnak hrik ngei minung 14 an hmuhchuah cang hna, a thi mi an um rih lo.