Thantlang Sipin Nih Nihnih Chung Cycle Ngunkhuai Lak Mi Sing 6 Renglo An Hmuh
Salai Elvis| 2019 July 2| Thantlang khuachung sipin nih lam pi ah thu in 2018-2019 kumkhat ca motor Cycle ngunkhuai a lak mi cu ni hnih chungah Ks.654,000 an hmuh tiah kan theih.
June 28 le July 2 ah a tubantuk in lamtonnak hmun ah um in Cycle aa cit mi paoh minung pakhat ah 3000 ngunkhuai an lak hi a si. Ni hnih tiang kum khat ca ngunkhuai (Tax) a pe mi Cycle 218 an si cang.
“Kum dang zongah a tubantuk in Cycle ngeimi paoh inn kip ah kal in ngunkhuai rak hal tawn an si. Tukum cu inn kip ah kal lo in lamtonnak hmun in kan bawh hna i cu hmun lila ah ngunkhuai kan pekter hna. Minung pakhat nih 3000 pek a si i cohlannak ca le ngunkhuai a pe cangmi a si ti theihnak catlap te zong kan pek chih hna. Catlap te cu Cycle an i cit paoh ah an i ken a hau ve. A ruang cu ngunkhuai pe cia mi a si cang maw ti theih khawhnak ah a si. Hmaikum lei in cun ruahnak tha deuh zong a chuak kho i ngunkhuai a pe cia mi paoh theih khawhnak ah an Cycle pakhat khat ah langsar ngai in Sticker hna in maw kan tuah te lai cu lo cun a theih an har tuk lai. Atu bantuk ngunkhuai kan lak mi le khua luh lai i motor/Cycle lutchuak ngunkhuai hal mi khi aa dang mi a si” tiah sipin zungriantuan tu pa pakhat niha chim.
Tutan ngunkhuai lak mi cu 2018 mini budget lio ah ngunkhuai rak lak lo mi he 2018-2019 kum khat ca he fonh in minung pakhat 3000 an lak hna hi a si.
About The Author
