Thantlang Tanghra Camipuai Phit Lio Lam Khammi Nawl Ngai Lo In Penguk Zungbawi Pakhat Nih A Pah Chih
The Chinland Post| 2018 March 15| March 15 Thantlang camipuai phit chung ah tuanvo ngeitu hna nih zalam pi cu motor le cycle an kham nain nawl ngailo in penguk zung bawi chang pakhat nih a pah chih tiah thawng kan theih.
Camipuai phit suimilam 3 chung cu sianginn kam ah motor le cycle kal khawh a si lonak kong catar le tuanvo ngeitu motor PK, palek le meithat zung hna nih hngah a si nain penguk zungbawi chang nih a tu bantuk in khuate lei khualtlawn a duh caah a pah chih hna hi a si.
“Kan rian cu a si ning tein kan tuan awk a si, motor in a ra i kan kham khuate ah khual tlawng ding ka si caah kalnak nawl cu a kan hal nain mizei hmanh kan kalter hna lo caah khuavelnak lam in kal khawh a si ko kan ti, si nain a duh lo caah duhsahte in ka kal lai a ti i a kal. Cu a kal lio cu Peter Store motor pakhat nih a hmuh caah a hnu in a dawi colh ve, cun cycle pakhat nih a dawi than ve i kan kham ngam ve ti lo. Phung kan sermi kanmah lila nih kan zulh lo cun mizapi nih cun zulh awk a har tuk cang” tiah motor PK pakhat nih TCP ah a chim.
Atu bantuk in camipuai tuah lio ah lam a tan hi zinglei 9:30 tluk ah a si. Tanghra camipuai phit lio ah zeibantuk motor paoh kham dih an si i cycle zong a seh nunter lo in minung nih an nam chom tiah theih a si.
“Kawlram chung dihlak in tanghra camipuai tuah lio hrim ah a pawngkam hnahnawhnak a um sual lai tiah motor/cycle kham dih a si. Thantlang cu hrial awk a that lo tikah cycle cu kan namter hna i motor cu kan kham bak hna” tiah motor PK tuanvo ngeitu Sai Khaw Lat nih a chim.
March 15 ni cu Geography subject an phit lio a si i March 16 ah History subject an phi lai i an dih cang lai tiah theih a si.
About The Author
