Thantlang TCSN Le Khrihfabu Kip Sinin Paletwa Ralzam Bawmhnak Sing 27 A Chuak
Salai Elvis| 2019 March 14| Harnak a tongmi Paletwa ralzam caah Thantlang Civil Society Network (TCSN) le Khrihfabu kip sin ah bawmhhalmi dihlak Ks. sing 27 a chuak tiah kan theih.
Paletwa ralzam bawmhnak ding caah Thantlang zatlang bukip fonh TCSN tawlrelnak in Thantlang khuachung TCF chungtel Khrihfabu kip sinah bawmhhalnak a tuah hnu hna ah le zatlang bu chungin mah le si khawh tawk an chapmi chung in sing 27 a chuah hi a si.
Khrihfabu kip sin a chuakmi; TBC (ks.1,000,000), Believers Church (350,000), AG (ks.316,000), Presbyterian (ks.110,500), Holiness(ks.108,000), TCBC (ks.100,000) Gospel Baptist Church (ks.100,000), Methodist (ks.41000), COTR (ks.93,000), Mara Evangelical Church (ks.100,000), RCM (ks.90,000) le The Church (ks.20,000). TCSN chungtel chungin zaanghlei kut a samhmi hna Chin Family Group nih (ks.101,500), Zunghmun sang Mino Bu (ks.20,000), CWSO (ks.100,000) le Pumtlamtlinglo (Chin Disable Organization) nih (ks.50,000) a si i TCSN le Khrihfabu 12 chung in a zapi a chuakmi sing 27 a si tiah kan theih.
Atubantuk in bawmhhalnak cu TSCN nih a tawlrelmi a si i Khrihfabu kip sin ah thawngthanhnak a tuah hna hnu ah Khrihfabu cio nih an mah le an thiam ning in an tawlrel hnu ah mah zat a chuah hi a si. Hi bawmhnak a chuakmi sing 27 cu Community Care for Emergency Response and Rehabilitation (CCERR) Hakha sin ah pekchanhnak an tuah cang i anmah nih Paletwa ralzam sin ah an pek te hna lai. Hi bawmhnak ah Thantlang lawng si lo in Tedim, Tonzang le Hakha zongah bawmhhalnak tuah a si ve tiah kan theih.
About The Author
