Thantlang Tho Paih Champion Laksawng Singkhat le Lai Puan An Pek Lai
Salai Elvis| 2018 October 23| TYA tawlrelnak in Thantlang Tho (Lai Kumthar) cu October 24 ah an tuah lai. Mah nih ah paih Champion cu tangka singkhat (100,000) le Lai puan an pek lai tiah theih a si.
Tutan Thantlang Tho ah paih laksawng hna cu minung pakhat tengh ah 1000, minung tamcem a teitu 70,000, Champion ah singkhat le Lai puan, zuamcawh ah a tlawmbik minung 3 a teimi lawng an lut kho lai.
“Mah ni ah laksawng tuah thanmi cu Volleyball pakhatnak 50,000, pahnihnak 30,000 le luhman phukhat ah 10,000 a si lai i TYA (Thantlang Youth Association) nih Fund kawlnak caah nuamhnak phunphun kan tuah rih lai” tiah TYA upa pakhat nih a chim.
Thantlang Tho cu zinglei suimilam 8 in a khan-na( biachim nak) an tuah hnu in ram hlasaknak, Lai laam, Chanthar laam le Lai thilpuan hmuhsaknak (Fashion show) an tuah lai. Volleyball, ruapar kai, dum le lo chungin thlai cin mi a lian bik le a tha bik laksawng peknak le ngakchia in upa tiang nuamhnak phunphun an tuah lai.
2016 kum Tho rak tuah lio ah paih Champion a hmutu cu kum 15 a si mi Pa Khamh Bik Ceu (Khuafo khua) a si i minung 12 a tengh hna caah pakhatnak Champion a rak hmu i laksawng zong singkhat rak pek a si pin ah a lenglei in laksawng tampi a rak pek bal tiah theih a si.
Thantlang Youth Association (TYA) nih a tu bantuk in 2016 October 29 ah anmah hrihhawhnak in an rak tuah bal i tukum zong anmah hruainak thiam in avoi 2nak Tho an tuah a si. Tutan an tuahnak chungah Thantlang khuachung um Nunphung Bu (zin-cehmuh-a phuaih) nih sing 5 an hlut hna tiah theih a si. +++
