Thantlang Um Pu Van Kil Thang Ngazuatmi A Thong Deng In An Firpiak

Salai Elvis|19 August 2019| August 18 (zarhpi ni) chun hrawng ah Thantlang khuachung sangthen No.2 um mi Pu Van Kil Thang a ngakhur pakhat ah 1000 renglo a zuatmi nga cu 30 tluk lawng tanh in a firpiak dih tiah kan theih.

“August 19 dum ah Nga rawl pek pah in ka va kal cu ka hmai a  chia colh, a ruang cu ka nga vialte a dihlak ngawt in an fir dih. Nga an tlaihnak hi kiangthong in  a si i cu an tlaihnak zong cu a kam ah an chiahtak. Mi fir pawl hi upa tuk an si lai lo, kum 30 hrawng le minung pali, nga an si lai ka zumh. A ruang cu an thiltuah le an nehnang zohnak in aa thei ko. Ka ngakhur hi pakhat lawng a si ko nain a tung pe 100 renglo le a vaang pe 40 a si. Cu chungah nga hi Shwe-wa le Myait-sa ka thlah hna i an dih lak 1000 renglo deuh an nung dam. An fir thlu lo mi hi 50 hrawng an si lai. Cu lawng cu an nganh tak i cu lo paoh cu an fir dih” tiah Pu Van Kil Thang nih TCP ah a  chim.

A nga an firpiak mi hi lehmah 18 cung le a tamdeuh cu lehmah12-15 kar deuh an si i Buva dum ah a zuat hna hi a si. A tu bantuk in a luanci kum lio ah voi hnih tiang an rak firpiak bal cang. Tukum February thla lio ah a ngakhur fahrinnak a tuahmi chungah sii an paihpiak caah fahring ding nga 140 tluk an rak thi dih tiah kan theih.

“Kum dang ah cun September thal deuh ah an fir. Tukum hi August thla ah a si hoi. Ka ngeih cu a chia ngai te, a zuar hmanh ka sian lo mi an si. Mi zei an si lai timi ka thei bak lo. Ka nga khur hi fir kho hna hlah seh tiah Mau ka zum i ka sawh dih hna nain cu zong cu an rak phoi dih i lengah an rak chuah” tiah a chimchap.

Atu bantuk in Thantlang khuacungah fir in a vak mi, dawrkhan le inn baohpiak, Tawlreiba phukpiak, Cycle fir le Nga khur firpiak tibantuk in a vak mi an tam nain palek sin ah Report nak tuah mi an um bantuk in a tuah lo mi zong an um hna, Cu chungah a tuni tiang mifir pawl cu Palek nih hmuh le tlaih khih mi an um rih lo tiah kan theih.

Leave a Commnet

%d bloggers like this: