Vok Rai Porcine Circovirus Type 2 (PCV-2); A Sining, I Chawnh Ningcang Le Runvennak Kong

Capar| TCP-Thantlang|30 May 2020|

Porcine Circovirus Type 2 (PCV-2)

Thantlang ah vok rai Porcine Circovirus Type 2 (PCV-2) ruangah vok 170 hrawng (khuachung-113+ Lahva-57) a thi cang (A tamdeuh kho cang men-zuatkhalhnak zung cazin ningin). Vok rai Porcine Circovirus Type 2 (PCV-2) hi 1994 kum hrawng ah PCV 1 le PCV 2 tiin Canada ram ah rak hmuh cangmi a si. A tu Thantlang i a ummi vok a zaw mi a thi (blood sample) an lak mi a phichuak ah vok a zaw mi Porcine Circovirus Type 2 (PCV-2) a si. Lai holh in vok thazaang der zawtnak kan ti khawh. Kawlram chungah Thanthlang lawng ah hmuh rih mi asi.

Zawtnak Aa Langhning

Vok an vun/cuar ah vandum zawg (blue color) bantuk tete aa deh lai I an phing pah lai. An der lai i a neh hnu ah an taksa rau nawn in a um lai. Cun, vokpi nih a hrinmi fa an thi lai.

Minung he ichawhkhawh a si maw?

Vok zawtnak hi minung he ichawnh khawh asi lo. A sa ei nak zongin i chawnh khawh a si lo. Aruang cu, vok rai Porcine Circovirus Type 2 (PCV-2) hi vok le vok, vok le ngal karlak hrawng lawngah aa chawnh kho mi asi. Vokfa thlahnih le thlathum karlak an si lio ah vok zawtnak nih thlunh a fawi bik. Cun, ar le uico sin zong ah aa chawnh khomi a si lo.

I chawnhning le a karhning

Rai a ngei cangmi vok nih a ek, a zun, a hnap, a cil sinin a dang sinh a va chawnh khawh. Vokpa in voknu kan raih tertik ah mah rai hi an i chawnh kho. Vokpi nih a fa le sin ah a chawnh khawh thiam hna. Rai a ngeimi vok nih a tonghmi, a liahmi thil pohpoh sinin a dang vok a chawnh khawh hna. Tho (tho hi pe 200 hrawng in thilrim a theih khawh), voksa einak kholhnawn in an i chawnh kho. Cun, vok sii chunhnak, vokinn kalnak phahnat, minung nih vok kan tonghthamnak thilpuan, vokthi phurhnak motor le motor cycle sinin an i chawnh kho.

I khamnak sii (vaccine) a um maw?

Vokrai in i khamnak sii hi zuatkhalhnak zung nih an chuahmi thanhca ning cun a um rih lo ti asi. A ruang cu blood sample an kuatnak laboratory tuanvo ngeitu nih hi zawtnak hi Kawlram chungah Thantlang lawngah hmuh rih a si caah i khamnak sii (vaccine) a um rih lo tiah an chim.

Irunven ding le hngalhawk

Vok na zuatmi hi rai in luat hna seh ti na duh ahcun, vok kawm ah mi lutchuak umter lo ding, vok kawm thiangtein tuah ding, thli luhchuah a thatnak te ah vok kawm sak ding, a cehtuk/ciar tuknak hmun ah chiah lo ding le vok thar na cawk tikah a dang tein chiah I a thing he fonh lo ah a tha. Cun, tho in ichawnh a fawituk caah vok inn ah tthung phulh, tthung a um lo ahcun vutcam le thetse phulh ah a tha bik.

Vokthi mi tawlrel tikah zulh awk

Vok rai um lio ah vok thah lo a tha bik. Na vok a thih ahcun a thihnak kam ah a si khawh ahcun a tlawmbik pe 4 thuk in khur na cawh lai I na phum lai. Hnawm hlawnhnak ah na hlonh lai lo. Tiva ah na hlonh lai lo. Khur cawhnak hmunhma na ngeih lo i khualeng ah ka phum lai na ti si ahcun vokthi kha a didor tlak lo nak dingah tha tein na tuam dih lai (a didor thlak sual ahcun tho uico le ar nih an cuk/ei lai in vok dang sin ah an va chawnh khawh hna) . Vokthi he aa tong mi thilri paoh poah kha na phum chih lai. Cun, zuatkhalhnak zung kha na chawnh hna lai i na phurhnak motor, motor cycle, tumbing le na vokinn kha tha tein pu-tet-se na kah ter hna lai.

Chirhchan:
Porcine Circovirus: A Historical Perspective J. Ellis.First Published February 25, 2014
Livestock Breeding and Veterinary Department (Zuatkhalhnak Zung)

Catialtu: Salai Uk Nun Bawi

Na ruahning rak langhter ve.. (Leave a comment)

%d bloggers like this: