Thantlang Zunghmun Sang Ah Thilri Zeihmanh Chuah Manh Lo In Inn A Kaang

0

Salai Elvis| 2019 May 8| May 8 chun lai suimilam 12 tluk ah Pu Ngun Bik tein a kang i inn chung thilri pakhat hmanh chuah manh lo in a ciam dih tiah kan theih.

“Kan ihnak khaan in mei cu aa thok. Zeitindah mei aa thawh ning a si timi zeihmanh ka hngal bak lo. Asinain, keimah ka ruahnak ah cun ihnak khan ah Meitek (mei lung) kan chiahmi dah ti lo cu zeihmanh a ruah awk ka thei lo” tiah inn ngeitu nu Pi Tha Tin Par nih TCP ah a chim.

Electric mei a mih lio te a si pin ah a dangdang meihol le Gas tibantuk zong an hmang chih lo nain inn ngeitu nu nih cun ihnak khan meitek (mei lung) chiah mi a si theu lai tiah a ruah damh.

“Suimilam 11 tluk ah thaithawh kan ei, mei a rat lo caah Tawk Ling tein ah Phone ka tun mi ka lak kar, kal he kir he minute 10 hmanh ka rau lai lo, Van Hrin Nu nan inn kang tiin an au colh, ihnak khan in zeitin dah mei aa thawh ti zong ka hngal lo. Keimah phone tun ka kal lai te ah hin ihnak khan ah cun ka fate zong Ta-na-kha ka thuh, kan chuak lai ka ti ah ka ti hal a ti i ihnak ah cun kan kir than ti zong ka dinh ko. Phone tun mi ka lak kar te ah a kangh hi a si. Zeital ka chuah manh hnga maw tiah inn pi kutka ka on nain mei a cak tuk tikah zei hmanh kan chuah manh lo” tiah Pi Tha Tin Par nih TCP ah a chim.

Hi mei cu suimilam 12 tluk ah a kang i minute 15 tluk ah meithahnak zung motor pakhat, tiphur motor pakhat le meithahnak zungriantuan, mizapi an i bawmh hnu minute 45 tluk ah mei an thah khawh dih.

“ An sungh mi dihlak zeizat dah a si timi kan thei fiang rih lo” tiah Meithahnak zung lutlai nih a chim.

Hi inn kanghnak nih hin a pawngkam um Van Lal Uk inn zong tlawmpal a hrem manh nain an thilri le a dangdang an chuahmanh pin ah an khamh manh. Inn ngeitu cu pohmah 285 ning in tazacuai le dantat dingin Thantlang palek zung nih an tawlrel lio pi a si tiah kan theih.

About The Author

Na ruahning rak langhter ve.. (Leave a comment)

%d bloggers like this: